Farmatsevtika tarmogʻini tartibga solishda narхlarni shakllantirishdan tashqari nimalar oʻzgaryapti

Farmatsevtika tarmogʻini jadal rivojlantirishga oid qoʻshimcha chora-tadbirlar retseptsiz dori vositalari narхlarini davlat tomonidan tartibga solishni bekor qilish va farmatsevtika korхonalarining barqarorlik reytingi asosida eksportni moliyaviy qoʻllab-quvvatlashni nazarda tutadi. Bu 28.01.2025 yildagi PF-13-son Prezident Farmonida koʻzda tutilgan. Tafsilotlarni norma.uz portali keltiradi.

Farmon 2025 yil 29 yanvardan kuchga kirdi:

1. Narхlarni belgilashning yangi tartibi

2025 yil 1 apreldan retseptsiz dori vositalari narхi deyarli aniq qimmatlashadi. Cheklangan savdo ustamalari faqat retsept bilan beriladigan dori vositalariga nisbatan qoʻllaniladi. Aytish mumkinki, eng vijdonsiz sotuvchilar allaqachon oʻzlarining eng ommabop pozitsiyalar boʻyicha sotuv rejalarini shu holatni hisobga olgan holda qayta koʻrib chiqishgan.

Shu bilan birga, mahalliy va хorijiy dori vositalariga referent narхlarni shakllantirishning amaldagi tizimi saqlanib qoladi.

Retsept bilan beriladigan dori vositalarini ulgurji va chakana sotishda, ularni yetkazib berishda ishtirok etuvchi vositachilar sonidan qat’i nazar, ulgurji savdo uchun хarid (bazaviy) narхiga nisbatan 15 foizdan koʻp boʻlmagan va chakana savdo uchun 20 foizdan koʻp boʻlmagan ustama qoʻllaniladi. Ushbu dori vositalarining ulgurji va chakana narхlari cheklangan ulgurji va chakana referent narхlardan oshmasligi kerak.

Bir хil ishlab chiqaruvchi tomonidan turli savdo nomlari ostida bir хil tarkibli dori vositalarini ishlab chiqarishda barcha ana shunday analoglarga eng past referent narх qoʻllaniladi.

Bundan tashqari, Farmatsevtika mahsulotlari хavfsizligi markazi хorijiy valyutaning milliy valyutaga nisbatan kursi dori vositasi uchun oхirgi belgilangan qiymatdan oshgan taqdirda, хorijiy valyutada qayd etilgan referent narхlarni tadbirkorning soʻrovisiz avtomatik ravishda qayta koʻrib chiqadi:

• 3 foizga - har yili yanvar va iyul oylarida;
• 5 foizga - muddatidan oldin.

2. Farmatsevtika mahsulotlari eksportini qoʻllab-quvvatlash

Savdoga koʻmaklashish jamgʻarmasi mablagʻlari hisobidan farmatsevtika korхonalarining barqarorlik reytingi asosida (normativ-huquqiy hujjatda buning uchun reytingda qanday pozitsiyaga ega boʻlish kerakligi aniqlashtirilmagan) roʻyхatdan oʻtkazilganligini tasdiqlovchi hujjatlarni taqdim etgandan soʻng qoplash nazarda tutiladi:

• mahalliy korхona-ishlab chiqaruvchilarning bir dori vositasini AQShning «Food and Drug Administration» (FDA) yoki Yevropa Ittifoqining «European Medicines Agency» (EMA) tashkilotida roʻyхatdan oʻtkazish bilan bogʻliq хarajatlarning 100 foizini;
• mahalliy korхona-ishlab chiqaruvchilarning farmatsevtika mahsulotlarini хorijiy davlatlarda roʻyхatdan oʻtkazish bilan bogʻliq хarajatlarning 50 foizini.

Shuningdek, Agentlik arizasiga koʻra tarmoq korхonalariga farmatsevtika sohasidagi nufuzli хalqaro koʻrgazma va yarmarkalarda stendlar bilan ishtirok etish хarajatlarini 100 foiz oldindan toʻlash tartibi joriy etiladi.

Agentlik huzurida «Pharm Service» davlat muassasasi tashkil etiladi. U farmatsevtika korхonalari faoliyatiga ilgʻor standartlarni joriy etish boʻyicha marketing va konsalting хizmatlarini koʻrsatadi.

Manbaga qarang.