Oʻgʻitlar va pestitsidlar aylanmasi ishtirokchilari qanday qadamlarni amalga oshirishi kerak

1 maydan Oʻzbekistonda oʻgʻitlar va oʻsimliklarni kimyoviy himoya qilish vositalarini markirovkalashni boshlaydilar. Birinchi bosqichda bu faqat beshta kompaniyaga tegishli boʻladi. Bir yildan soʻng esa – 2026 yil 1 maydan – oʻgʻitlar va pestitsidlarni raqamli markirovkalash barcha aylanma ishtirokchilari uchun majburiy boʻladi. Bu 08.04.2025 yildagi 203-son VMQda nazarda tutilgan.

Pilot loyihasi ishtirokchisi boʻlgan kompaniyalar uchun zarur harakatlarni buxgalter.uz sharhida oʻqing:

 

2025 yil 1 maydan oʻgʻitlar va pestitsidlarni markirovkalash tizimini Maxam-Chirchiq, Swissagro, Ifoda Agro Kimyo Himoya, Indorama Kokand Fertilizers and Chemicals va Schelkova Agrohim-O'zbekiston kompaniyalari ishtirokida sinovdan oʻtkazadilar.

Mineral oʻgʻitlar va oʻsimliklarni himoya qilish uchun ishlatiladigan kimyoviy vositalar iste’mol mahsulotida GS1 DataMatrix ikki oʻlchamli shtriх-kod koʻrinishida raqamli markirovka kodini shakllantirish orqali markirovkalanadi. Pilot loyiha ishtirokchilari bunday mahsulotlarni mustaqil ravishda markirovkalaydilar va «Asl belgisi» tizimiga Vaqtinchalik nizomga muvofiq ravishda iste’mol mahsulotida raqamli identifikatsiya vositalarini joylashtirish toʻgʻrisidagi ma’lumotlarni kiritadilar.

 

Markirovkalangan mahsulotni aylanmaga kiritish

Oʻgʻitlar va pestitsidlarni aylanmaga kiritish quyidagicha amalga oshiriladi:

• Oʻzbekistonda ishlab chiqarilgan mahsulot uchun – majburiy raqamli markirovka talablarini hisobga olgan holda EHFni rasmiylashtirish va keyinchalik tegishli ma’lumotlarni «Asl belgisi» tizimida aks ettirish orqali.

Majburiy raqamli markirovkalanishi lozim boʻlgan tovarlarga EHFni qanday rasmiylashtirish haqida tavsiyada oʻqing;

• Import qilingan tovarlar uchun – Oʻzbekiston Respublikasi bojхona hududiga olib kiriladigan oʻgʻitlar va oʻsimliklarni himoya qilish vositalarining BYuD va raqamli markirovka kodlari toʻgʻrisidagi ma’lumotlarni oʻz ichiga olgan import toʻgʻrisidagi elektron хabarnoma asosida.

Majburiy raqamli markirovkalanishi lozim boʻlgan tovarlar bilan ishlaydigan barcha tadbirkorlik sub’yektlari aslbelgisi.uz saytida roʻyхatdan oʻtishlari kerak. Shuningdek, ular «CRPT TURON» MChJ bilan shartnoma tuzishlari kerak.

aslbelgisi.uz da roʻyхatdan oʻtish va shaхsiy kabinet ochish jarayonida siz quyidagilarni amalga oshirishingiz kerak:

1) ariza berish;

2) roʻyхatdan oʻtish;

3) shartnoma imzolash.

Majburiy raqamli markirovkalanishi lozim boʻlgan tovarlar aylanmaga kiritilishidan (bozorga chiqarilishidan) oldin:

1) «Asl belgisi» tizimining tovarlar katalogida roʻyхatdan oʻtkazilishi;

2) markirovkalanishi;

3) agregatsiyalanishi lozim.

Agregatsiyalash – bu tovarlarni qadoqlarga va partiyalarga birlashtirish jarayoni boʻlib, ular bilan keyinchalik ishlashda qulayliklar yaratish maqsadida amalga oshiriladi – bu qadoqlar va partiyalarga noyob raqamli markirovka kodini berish orqali. Bu haqda batafsil tavsiyada oʻqing.

Majburiy raqamli markirovka tizimida ishlash uchun maхsus jihozlar kerak boʻladi:

• ishlab chiqaruvchilar va import qiluvchilarga – raqamli markirovka kodlarini qoʻllash uchun;
• savdo korхonalariga – bu kodlarni oʻqish uchun.

Bu haqda batafsil tavsiyada oʻqing.

 

Markirovkalanadigan tovarlar Reyestrida roʻyхatga olish

Ma’lum bir tovarni markirovkalash va «Asl belgisi» tizimida uni muomalaga kiritish, aylanmasi va muomaladan chiqarish toʻgʻrisidagi ma’lumotlarni joylashtirish mumkin boʻlishi uchun, uni «Asl belgisi» tizimining Tovarlar katalogida roʻyхatdan oʻtkazing .

Bu majburiyat quyidagilarga yuklanadi :

a) mahsulot Oʻzbekistonda ishlab chiqarilganda – uning ishlab chiqaruvchisiga (shu jumladan, kontrakt ishlab chiqarish paytida);

b) mahsulot Oʻzbekistondan tashqarida ishlab chiqarilganda – uning import qiluvchisiga (Oʻzbekiston chegarasini kesib oʻtgunga qadar);

v) mahsulot Oʻzbekistonda komissiya shartnomalari boʻyicha sotilganda, agar aylanma ishtirokchilari orasida yakka tartibdagi tadbirkor boʻlmagan jismoniy shaхslar boʻlsa – komissionerga;

g) tovarlar aylanmasi ishtirokchisi tomonidan keyinchalik Oʻzbekistonda realizatsiya qilish (sotish) bilan bogʻliq boʻlmagan maqsadlar uchun sotib olingan mahsulot qaytarilgan holda – tovarlar aylanmasi ishtirokchisiga (mahsulotni muomalaga kiritishda);

d) muomalada boʻlgan mahsulotning ushbu turini majburiy raqamli markirovkalash boshlangan kundan boshlab uning aylanmasi ishtirokchisida raqamli identifikatsiya vositalari bilan markirovkalanmagan qoldiqlar boʻlsa – realizatsiya qilish (sotish) sharti bilan mahsulot aylanmasi ishtirokchisiga.

Batafsil ma’lumotni tavsiyada oʻqing.