Получите быстрые ответы, проверенные экспертами:
Бу янгиликни четлаб ўтолмаймиз: 10 декабрдан бошлаб «пилот лойиҳа» доирасида «Соғлиқни сақлаш тизимини рақамлаштириш жараёнларини янада жадаллаштириш бўйича қўшимча чора-тадбирлар тўғрисида»ги 570-сонли ВМҚнинг 4-бандига кўра, Тошкент шаҳрида ва вилоятлар бўйича яна 15 та туман (шаҳар)да рецепт бўйича дори воситасини сотиб олиш учун QR-кодли электрон рецептга эга бўлиш керак.
Buxgalter.uz янги тартиб қандай ишлашига аниқлик киритди:
Керакли тушунтиришни ўтказиб юбормаслик учун бизнинг Телеграм-каналимизга обуна бўлинг.
Эслатиб ўтамиз: 08.09.2025 йилдаги 570-сон ВМҚ билан, тиббий хизматлар кўрсатувчи ва дори воситаларини чакана реализация қилувчи юридик шахслар учун лицензиялар паспортлари янги лицензия талаблари билан тўлдирилди. Хусусан:
- тиббиёт муассасалари ва дорихоналар учун лицензия талаблари ва шартларини белгиловчи лицензия паспортларига соғлиқни сақлашни рақамлаштириш билан боғлиқ янги мажбурий шартлар киритилди;
- тиббиёт клиникалари учун Соғлиқни сақлаш вазирлигининг «Электрон соғлиқни сақлаш» тизими билан интеграция орқали «Рақамли соғлиқни сақлаш» платформасига уланиш ва реал вақт режимида қуйидаги модуллар билан маълумотлар алмашинувини таъминлаш талаби қўшилди:
– «Электрон поликлиника»,
– «Электрон касалхона»,
– «Электрон тиббий карта»,
– «Электрон рецепт»;
- дорихоналар учун алоҳида талаб жорий этилди: «Рақамли соғлиқни сақлаш» платформасига уланиш ва «Электрон рецепт» модули билан реал вақт режимида маълумот алмашиш;
- амалга ошириш муддатлари:
– 2025 йил 10 декабрдан бошлаб ушбу талаб Тошкент шаҳри ва «пилот лойиҳа»да иштирок этувчи 15 та туман (шаҳар)да амал қила бошлади;
– 2027 йил 1 январдан бутун республика бўйлаб жорий этилади.
Эътибор беринг
Лицензия паспортида назарда тутилган талаблар ва шартларга риоя этиш мажбурий талабдир.
Лицензия талаблари ва шартлари бузилганлиги аниқланган тақдирда, лицензияловчи орган лицензиянинг амал қилишини тўхтатиб туриши мумкин.
Дори рецепт бўйича бериладими ёки йўқми, буни uzpharm-control.uz сайтида аниқлаш мумкин > > >
У ерда 8 та Excel файли билан қуйидаги архив* мавжуд (*мақола чоп этилган санадаги ҳолатга кўра):
- маҳаллий дори воситалари,
- МДҲ мамлакатларида ишлаб чиқарилган дори воситалари,
- хорижий мамлакатларда ишлаб чиқарилган дори воситалари,
- дори воситаларининг субстанциялари,
- касалликларни in vivo ташхислаш учун дори воситалари,
- тиббий техника,
- тиббий буюмлар,
- in vitro диагностика учун тиббий буюмлар.
Бу қуйидагича кўринади:
Сўровга кўра, Тошкент шаҳридаги поликлиникалардан бирида янги тартиб тушунтирилди:
1) бемор ўз участка врачи қабулига боради;
2) маслаҳатдан сўнг шифокор QR-кодли электрон рецепт ёзади;
3) уни дорихона беморларнинг электрон тиббий карталарини юритиш учун мўлжалланган Dmed ягона ахборот тизими орқали кўради. Бемор дастурни телефонга ўрнатади, Face ID ва ЖШШИР бўйича идентификация қилинади, шундан сўнг маълумотлар базадан автоматик равишда олинади;
4) бемор «Менинг рецептларим» бўлимидан керакли рецептни топади ва дорихонада QR-кодни тақдим этади.
Соғлиқни сақлаш вазирлиги бугун, 12 декабрь куни танқидлар тўлқинидан сўнг электрон рецептлар масаласи бўйича ишчи гуруҳ йиғилишини чақирди. Натижаларни интизорлик билан кутамиз...
Buxgalter.uz тавсия қилади
Юлия ТАРШИЛОВА тайёрлади
