Айланмадан олинадиган солиқ ва фойда солиғини тўлаган йил учун қандай ҳисобот топшириш керак

Корхона айланмадан олинадиган солиқ тўлаган, 2024 йил 1 августдан эса ҚҚС ва фойда солиғига ўтган. Бундай ҳолатда солиқ ва молиявий ҳисоботни қандай тақдим этиш ҳақида «Норма» экспертлари тушунтириш берди:

Айланмадан олинадиган солиқ

2024 йилнинг январь–июль ойлари учун корхона айланмадан олинадиган солиқ бўйича ҳисоботни ҳар ойда ўсиб борувчи якун билан тақдим этиши керак эди  . Лекин бу қатъий суммада айланмадан олинадиган солиқ тўловчиларга тааллуқли эмас, улар ушбу солиқ бўйича ва дивиденд кўринишидаги даромадлар қисмида солиқ ҳисоботини тақдим этишдан озод қилинган . ҚҚС ва фойда солиғини тўлашга ўтгандан сўнг ҳисобланган айланмадан солиқ суммаси қайта ҳисобланмайди.

ҚҚС

2024 йил августдан бошлаб корхона ҚҚС бўйича ҳисоботни ҳар ойда ўсиб бормайдиган якун билан тақдим этади  .

Фойда солиғи

2024 йил августдан бошлаб корхона фойда солиғи бўйича ҳисоботни ҳар чоракда ўсиб борувчи якун билан тақдим этади  . Бунда солиқ ҳисоб-китобида 2024 йилнинг январь–июль ойлари учун даромадлар ва харажатлар кўрсаткичларини ҳисобга олмайди.

Молиявий ҳисобот

БҲМС бўйича тузилган Молиявий натижалар тўғрисидаги ҳисоботнинг 5 ва 6-устунларида (ҳисобот даври учун маълумотлар) акс эттиринг:

• бутун 2024 йил учун даромадлар ва харажатлар (зарарлар) кўрсаткичлари;
• 250-қаторда – 2024 йилнинг август–декабрь ойлари учун ҳисобланган фойда солиғи суммаси;
• 260-қаторда – 2024 йилнинг январь–июль ойлари учун ҳисобланган айланмадан солиқ суммаси.

Натижада 270-қаторда сиз ҳисобот даврининг соф фойдаси (зарари) суммасини оласиз, бу бухгалтерия ҳисоби маълумотларига мос келиши керак.

Аввалги йилларда ҳам солиқ ва молиявий ҳисоботни тақдим этишнинг худди шундай тартиби амал қилган.