Ертўла ва чордоқ ижарасига доир шартномалар ijara.soliq.uzда қандай рўйхатдан ўтказилади

ХУМШ тадбиркорлик субъектларига биноларнинг ертўла ва чордоқларини ижарага беради. Кейинчалик ижарага олувчида солиқ органлари билан муаммолар юзага келмаслиги учун бундай кўчмас мулк ижарасига доир шартномани қандай рўйхатдан ўтказиш керак?

Саволга “Norma” профессионал ривожланиш маркази вебинари доирасида Солиқ қўмитасининг Солиқ тўловчиларга хизмат кўрсатиш департаменти бош давлат солиқ инспектори Санжар ХАЙРИТДИНОВ жавоб берди:

– Бундай шартномалар ijara.soliq.uz сайтида рўйхатдан ўтказилиши лозим.

Хусусий уй-жой мулкдорлари ширкати шартнома тузилган пайтдан эътиборан 10 кунлик муддатда ижара шартномаси тўғрисидаги ахборотни ijara.soliq.uzга киритиши, ижарага олувчи эса ушбу ахборот порталда пайдо бўлганидан кейин 15 кун ичида – маълумотларни тасдиқлаши шарт. Агар ижарага олувчи киритилган ахборотда ноаниқликни кўрса, у ижарага берувчи хатони тузатмагунча сабабларини кўрсатган ҳолда тасдиқлашни рад этишга ҳақли.

Биринчи марта ижара шартномасини рўйхатдан ўтказаётган ширкатлар кўпинча мураккабликларга дуч келишади. Улар шартномани “Ижара шартномасини ҳисобга қўйиш” тугмаси функционали ёрдамида рўйхатдан ўтказишга уринишади, аммо уддалай олишмайди, сабаби ижарага берилаётган объект ёки бино “Кўчмас мулк объектлари” сатрининг чиқиб келадиган тавсиясида чиқмайди. Кадастр органларида рўйхатдан ўтказилмаган тақдирда шундай муаммолар юзага келади.

Қоидага кўра, биринчи марта ижарага берилаётган ертўла ва чордоқ ҳали рўйхатдан ўтказилмаган бўлади. Буни амалга ошириш учун хусусий уй-жой мулкдорлари ширкати кадастр органларига мурожаат қилиши лозим. Нотурар жой биноси рўйхатдан ўтказилганидан кейин ижарага берувчи (ХУМШ) ижара шартномасини ijara.soliq.uz сайтида рўйхатдан ўтказишга киришиши мумкин.

1. Ширкатнинг ЭРИси ёрдамида ijara.soliq.uz сайтига киринг.

2. Сайтнинг бош саҳифасида “Ижара шартномасини ҳисобга қўйиш” тугмасига, сўнгра – “Бошқа ижара” тугмасига босинг.

3. “Ижарага бериладиган кўчмас мулк тўғрисида ахборот” бўлимида “Кўчмас мулк объекти” сатрида чиқиб келадиган тавсиядан кераклисини танланг, шундан сўнг экранда шакл очилади. Унда қуйидаги сатрларни тўлдириш керак бўлади:

• шартномага асосан ижаранинг бошланиш ва тугаш санаси;
• фойдаланиш мақсади. Чиқиб келадиган тавсиядан кераклисини танланг: савдо фаолияти, хизмат, умумий овқатланиш, омбор, офис, ишлаб чиқариш, бошқа;
• майдоннинг тури. Чиқиб келадиган тавсиядан нимани ижарага беришингизни танланг: ертўла ёки чордоқ;
• ижарага берилаётган бинонинг майдони;
• ижара қиймати.

4. Ижарага берувчи тўғрисида ахборот ЭРИси маълумотлари асосида автоматик тарзда тўлдирилади. Агар ХУМШнинг ҳақиқатда жойлашган жойи кўрсатилганидан фарқ қилса, қўшимча майдонлар очиб, уни ёзиш мумкин. Бунинг учун “Ҳақиқий манзил” таклифи ёнида белги қўйиш лозим.

5. Ижарага олувчи тўғрисида ахборотда у ким ҳисобланишини кўрсатиш лозим: юридик ёки жисмоний шахс. Тегишинча, ижарага олувчининг СТИР ёки ЖШШИРни кўрсатиш керак.

6. “Жўнатиш” тугмасига босинг.

ХУМШ шартномани сайтга киритганидан сўнг, ижарага олувчи шартномани тасдиқлаш учун у тўғрисидаги ёзувни “Ижара шартномалари рўйхати” тугмаси остида топиши мумкин.

Олег ГАЕВОЙ тайёрлади