Қайта ишлашга берилган хом ашё ва ундан тайёрланган маҳсулотларни ташишда ЭТТЮХни қандай расмийлаштириш керак

Август ойининг биринчи ўн кунлигида Солиқ қўмитаси қайта ишлашга берилган  хом ашё ва ундан тайёрланган маҳсулотларни ташишда электрон товар-транспорт юк хатини расмийлаштириш қоидаларини ўзгартирди. Агар илгари ташиш тури сифатида "Омбордан омборгача" кўрсатилган бўлса, энди "Қайта ишлашга топшириш" махсус функционали пайдо бўлди.

Янги функционал билан ишлашда нималарга эътибор бериш кераклигини buxgalter.uz илтимосига кўра Didox электрон ҳужжат айланиши операторининг мутахассислари тушунтириб берди:

– Қайта ишлашга берилган  хом ашё ва ундан тайёрланган маҳсулотларни ташишда ЭТТЮХ расмийлаштириш керак. Иккала ҳолатда ҳам янги қоидаларга кўра ЭТТЮХни юк жўнатувчи жўнатади.

Ташиш тури сифатида "Қайта ишлашга топшириш"ни танланг.

1. Қайта ишлашга берилгант хом ашёни ташишда

Агар қайта ишлашга берилган  хом ашё қайта ишловчининг омборига етказиб берилса, юк олувчи сифатида қайта ишловчи корхонани кўрсатинг.

Юклаш манзили - юк жўнатувчининг омбори, етказиб бериш манзили – қайта ишлашга берилган  хом ашё топшириладиган ташкилотнинг омбори.

2. Қайта ишлаш маҳсулотини буюртмачига етказиб беришда

Буюртмачига қайта ишлаш маҳсулотини жўнатаётганда, қайта ишловчи ўзини юк жўнатувчи сифатида, хом ашёни қайта ишлашга берган корхонани эса - юк олувчи сифатида кўрсатади.

Юклаш манзили - қайта ишловчи ташкилотнинг омбори, етказиб бериш манзили - қайта ишлаш маҳсулоти етказиб бериладиган хом ашё эгасининг омбори.

ЭТТЮХни расмийлаштиришнинг бошқа тафсилотларини қуйидаги тавсияда ўқинг:

• Электрон товар-транспорт юк хатини ким ва қандай расмийлаштириши керак.

Олег ГАЕВОЙ тайёрлади