2023 йилнинг III чораги учун статистика бўйича ким ҳисобот топширади

Бугунги кунда статистика агентлиги сайтида 4-kb savolnoma ва 4-kb (sanoat) шакли бўйича 2023 йилнинг III чораги учун танлама кузатув остига тушган кичик корхоналар ва микрофирмалар Рўйхати эълон қилинди.

Дастурга қандай кириш ва шаклни тўлдириш керак

Паролни кўрсатиб, ЭРИ ёрдамида ҳавола бўйича eStat 4.0 дастурига киринг. Ташкилотингиз номи ва унинг реквизитлари кўрсатилган ойна очилади: КТУТ, СТИР.

Ташкилотингиз номига босинг ва сиз шахсий кабинетга ўтасиз. Унинг ўнг қисмида тугмалар акс этади – сизнинг статистик ҳисоботларингиз ҳолати: «Юборилган», «Рад этилган», «Қабул қилинган», шунингдек статистика органлари ваколатли вакилларининг хабарномалари.

Экраннинг чап қисмида тавсия этилган рўйхатдан «Кичик бизнес ва тадбиркорлик» иловаси ёрлиғини танланг:

• «Кичик бизнес ва тадбиркорлик» иловасини – агар 4-kb savolnoma шаклини тўлдириш ва юбориш зарур бўлса;
• «Саноат» иловасини – агар 4-kb (sanoat) шаклини тўлдириш ва юбориш зарур бўлса.

Кейин керакли шаклни танланг ва «Юбориш» тугмасини босинг. Хавотир олманг, шакл дарҳол юборилмайди, у тўлдириш учун очилади.

Шаклнинг барча керакли бўлимларини кўрсаткичлар билан тўлдиринг (статистика ҳисоботининг юқори панели) ва яна «Юбориш» тугмасини босинг.

Шакл бўлимларининг жадвал остида 4-kb savolnoma ёки 4-кб саноат шаклининг у ёки бу қисмида қайси кўрсаткичлар акс эттирилиши керак бўлган эслатма-кўрсатмалар мавжуд.

Шаклларнинг ҳар бир бўлими учун мантиқий назорат назарда тутилган – кўрсаткичлар тўғри тўлдирилганлигини формулалар билан текшириш учун.

Тўлдирилган ҳисобот шаклини 4-kb savolnoma шаклининг «Якуний қисми»даги тегишли тугмани босиш орқали Ехcелга юклаш мумкин.

«Шахсий кабинет»дан чиқиш учун унинг юқори чап қисмидаги ташкилотингиз номини, сўнгра «Чиқиш» тугмасини босинг.

 Татьяна ЛЫМАРЕВА,

«Норма» эксперти