Нима учун лизинг операциялари ёки кўчмас мулк билан боғлиқ операциялар тўхтатиб қўйилиши мумкин

Рус тилида ўқиш
preview

Лотереялар ташкилотчилари учун жиноий фаолиятдан олинган даромадларни легаллаштиришга қарши курашиш бўйича ички назорат қоидалари тасдиқланди . Шунингдек, риэлторлик ташкилотлари  ва лизинг хизматлари кўрсатувчилар  учун шунга ўхшаш қоидаларга тузатишлар киритилди. Тафсилотлар - norma.uz портали шарҳида:


Ички назорат вазифаларидан бири - даромадларни легаллаштириш ва шу каби фаолият билан боғлиқ шахслар тўғрисида ахборотни тезкор аниқлаш.

Лотереялар ташкилотчиси, лизинг берувчи ёки риэлторлик ташкилотининг масъул шахси шубҳали операциялар ёки мижозларнинг ҳаракатлари ҳақида махсус ваколатли давлат органини хабардор қилиши шарт.

Ва агар:

  • мижоз шубҳали шахслар Рўйхатига киритилган бўлса,
  • ёки Рўйхатга киритилган шахс номидан ёхуд унинг топшириғи бўйича фаолият кўрсатаётган бўлса,
  • ёки операцияни амалга оширишда фойдаланаётган пуллар ёки бошқа мол-мулк тўлиқ ёки қисман Рўйхатга киритилган шахсга тегишли бўлса,
  • ёхуд ташкилот-операция қатнашчиси бундай шахснинг мулкида ёки  назорати остида бўлса, -

операция кечиктирилмасдан ва олдиндан хабар қилинмасдан тўхтатилади, мол-мулк эса ишга солмай тўхтатиб қўйилади.

Операциялар Террорчилик фаолиятида ёки оммавий қирғин қуролини тарқатишда иштирок этаётган ёки иштирок этишда гумон қилинаётган шахслар рўйхатига киритилган шахсларнинг операцияларини тўхтатиб туриш, пул маблағларини ёки бошқа мол-мулкини ишга солмай тўхтатиб қўйиш, ишга солмай тўхтатиб қўйилган мол-мулкидан фойдаланишга рухсат бериш ва операцияларини тиклаш тартиби тўғрисидаги низомга мувофиқ ишга солмай тўхтатиб қўйилади ва тикланади.

Эътибор беринг!
Операциянинг тарафларидан бири жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш соҳасида халқаро ҳамкорликда иштирок этмаётган давлатда доимий яшаётган, турган ёки рўйхатга олинган шахс бўлса, бундай операция ҳам ҳуқуқни муҳофаза қилиш органларининг жиддий эътибори остига тушади.

Қоидаларга биноан операциялар тўғрисидаги ахборотни шундай тарзда расмийлаштириш лозимки, зарурат бўлганда операциянинг тафсилотларини тиклаш имконияти бўлиши керак.

Риэлторлик ташкилотлари, лизинг берувчилар ва лотереялар ташкилотчилари жиноий фаолиятдан олинган даромадларни легаллаштиришга қарши курашиш билан боғлиқ бўлган ахборотдан эркин фойдаланишни чеклайдилар ва мижозларга, уларнинг операциялари ҳақида назорат қилувчи органга маълумот берилганлиги тўғрисида ахборот беришга ҳақли эмаслар.

Манбага қаранг.

Ҳужжатлар Қонун ҳужжатлари маълумотлари миллий базасида эълон қилинган ва 17.06.2021 йилдан кучга кирди.


Norma.uz материаллари асосида