Чет эл компанияси учун ишлайдиган хорижлик Ўзбекистонда қандай солиқларни тўлайди

“РФ фуқароси РФдаги компания учун ўзини ўзи банд қилган шахс сифатида ишлайди ва РФда 6% солиқ тўлайди. Ўзбекистонга туризм мақсадида келган, лекин мамлакатда 183 кундан ортиқ муддат турибди. У резидентга айланганлиги боис ЖШШИР олиши ва Ўзбекистонда қандайдир солиқларни тўлаши керакми?”.

Buxgalter.uz илтимосига биноан саволга “Assistance In Tax” солиқ маслаҳатчилари ташкилоти директори Радмила КАРИМОВА жавоб берди:

– Ўзини ўзи банд қилган шахсларнинг фаолияти Ўзбекистонда Ўзини ўзи банд қилган шахс сифатида фаолиятни амалга ошириш тартиби тўғрисида низом билан тартибга солинади. Россия Федерацияси қонунчилигига асосан ўзини ўзи банд қилган шахс ҳисобланадиган чет эл фуқароси Ўзбекистонда бундай тарзда эътироф этилмайди. Бинобарин, солиқ мақсадларида уни солиқ резидентлиги нуқтаи назаридан кўриб чиқиш лозим.

Чет эл фуқароси Ўзбекистонга қандай мақсадда келганлигидан қатъи назар, унинг бўлиши тегишли мақоми ўзига нисбатан белгиланган солиқ даври бошланадиган ёки тугайдиган ҳар қандай кетма-кет 12 ойлик давр давомида жами 183 календарь кундан ошса, у Ўзбекистоннинг солиқ резиденти деб эътироф этилади .

Бу ҳолда Ўзбекистоннинг резидентига айланган чет эллик барча даромадлар, шу жумладан – Ўзбекистондан ташқарида олинган даромадлар бўйича – жами даромади тўғрисида декларация тақдим этиши шарт .

Бунда РФда тўланган солиқ ҳисобга олиниши мумкин, башарти чет эллик солиқ тўланганлиги тўғрисида РФ солиқ органидан маълумотнома тақдим этса. Солиқни ҳисобга олиш СКнинг 342-моддасида белгиланган қоидалар бўйича амалга оширилади.

Декларацияни тақдим этиш учун чет эллик ЖШШИР олиши керак. Шунингдек, ЭРИси олиш ва декларацияни солиқ тўловчининг шахсий кабинети орқали жўнатиш мақсадга мувофиқдир.

Декларацияни тақдим этиш муддати – ҳисобот йилининг 1 апрелидан кечиктирмай . Солиқни тўлаш муддати – ўтган солиқ давридан кейинги йилнинг 1 июнидан кечиктирмай .

Чет эллик ижтимоий солиқни тўламайди.

Чет эл фуқароларининг Ўзбекистоннинг жамғариб бориладиган пенсия таъминотида иштирок этиши ихтиёрий ҳисобланади .