СКдан ташқари имтиёзлар мавжуд бўлганда мол-мулк ва ер солиқларини 1% миқдорида тўлаш

СКнинг 483-моддаси ёки Президентнинг ёки Вазирлар Маҳкамасининг қарорлари билан мол-мулк ва ер солиқларини тўлашдан тўлиқ озод қилинган юридик шахслар – мол-мулк солиғи ва ер солиғи тўловчилар жорий йилнинг август ойидан бошлаб ушбу солиқларни ҳисобланган сумманинг 1%и миқдорида тўлайди. 

Бироқ ҳам Солиқ кодекси, ҳам бошқа НҲҲ бўйича имтиёзларга эга бўлган ташкилотлар мавжуд. Улар ушбу солиқларни тўлашлари зарур ёки зарур эмаслигини Молия вазирлиги Солиқ-божхона сиёсати ва даромадларини прогнозлаштириш департаменти ходимлари – ресурс солиқлари ва мол-мулк солиғи методологияси бўлими бошлиғи Зарема МЕНАЛИЕВА ва бош мутахассис Муҳиддин ХОЛМУРОДОВ тушунтиришди:

– Саволга бериладиган жавоб солиқ тўловчи ушбу солиқлар бўйича имтиёзларни қайси қонун ҳужжати бўйича қўллашига боғлиқ.

Мисол учун, 15.09.2017 йилдаги ПҚ-3276-сон қарорга асосан, мактабгача ва умумий ўрта таълим соҳасида нодавлат таълим хизматларини кўрсатиш фаолияти билан шуғулланадиган юридик шахслар 2025 йил 1 январгача бўлган муддатда барча солиқ турларини тўлашдан озод этилган. Бу – мақсадли имтиёз бўлиб, бўшайдиган маблағлар муайян мақсадларга йўналтирилади .

Шу билан бирга, СКга асосан:

• юридик шахсларнинг мол-мулкига солинадиган солиқ бўйича база таълим объектларининг қийматига камайтирилади ;
• таълим объектлари эгаллаган ерлар юридик шахсларнинг солиқ солинмайдиган ер участкалари жумласига киради .

Солиқ тўловчи солиқ имтиёзларидан фойдаланиш ёки фойдаланмасликни  мустақил ҳал қилишга ҳақли (ҚҚСдан озод қилинадиган товарларни (хизматларни) реализация қилиш бундан мустасно) . Бинобарин, агар мактабгача ёки умумий ўрта таълим нодавлат ташкилоти имтиёзларни:

• Президентнинг қарорлари бўйича қўлласа - у мол-мулк солиғи ва ер солиғини ҳисобланган сумманинг 1%и миқдорида тўлайди ;
• Солиқ кодекси бўйича қўлласа (СКнинг 483-моддасидан ташқари) - у мазкур солиқларни тўламайди.