Хорижий хизмат сафаридан қайтиб келиш кунида кундалик харажатлар учун ҳақ қандай тўланади

«Ходим кундузги соат 12:00 да Туркиядан хорижий хизмат сафаридан Тошкентга қайтиб келди. Бу кун буйруққа мувофиқ хизмат сафари кунларига киритилганди. У доимий асосда Навоийда яшайди ва ишлайди. Бухгалтер бу кун учун ходимга Туркия меъёрлари бўйича эмас, балки Тошкент шаҳри меъёрлари бўйича кундалик харажатлар учун ҳақни ҳисоблаб чиқарди. Бу кун учун кундалик харажатларга ҳақ қайси меъёрлар бўйича тўланади?»

Вазиятни buxgalter.uz учун махсус «Норма» эксперти Азизахон ТОШХЎЖАЕВА тушунтирди:

– Вазирликлар, идоралар, корхоналар ва ташкилотлар ходимлари Ўзбекистон Республикаси ташқарисига хизмат сафарига юборилганда хизмат сафари харажатлари учун маблағлар бериш тартиби тўғрисидаги низомнинг 4-бандига асосан:

• кундалик харажатлар хизмат сафаридаги ҳар бир кун, жумладан жўнаб кетиш ҳамда қайтиб келиш куни учун, белгиланган меъёрларнинг 100 фоизи миқдорида чет эл валютасида тўланади;
• жўнаб кетиш ҳамда кайтиб келиш куни Ўзбекистон Республикасининг давлат чегарасини кесиб ўтиш куни ҳисобланади;
• давлат чегарасини кесиб ўтиш куни хизмат сафарига юборилган шахснинг паспортида Ўзбекистон чегара-назорати пунктлари қўйган белгиси бўйича аниқланади;
• ҳаво транспортида учиб кетилганда – агар хорижий давлатга етиб бориш санаси халқаро авиарейснинг Ўзбекистон аэропортидан учиб кетган санасидан кейингисига тўғри келган ҳолларда (авиачиптага асосан), жўнаб кетиш куни учун кундалик харажатлар берилмайди;
• ҳаво транспортида учиб келганда – агар Ўзбекистонга етиб келиш санаси халқаро авиарейснинг хорижий давлатининг аэропортидан учиб кетган санасидан кейингисига тўғри келган ҳолларда (авиачиптага асосан), қайтиб келиш куни учун кундалик харажатлар берилмайди.

Тегишинча, агар авиачиптага асосан халқаро рейс хорижий давлатдан учиб келиб, Ўзбекистонга айнан бир санада етиб келса, бу кун учун ушбу хорижий давлат учун белгиланган меъёрлар бўйича кундалик харажатлар учун ҳақ тўланади.

Ходимингиз Туркиядан хизмат сафаридан Тошкентга кундузги соат 12:00 да қайтиб келган. У Туркиядан тўғридан-тўғри Истанбул–Тошкент рейси билан учиб келди, деб фараз қилайлик. Авиачипталарга асосан ушбу рейснинг одатдаги давомийлиги 4 соат 30 дақиқани ташкил этади. Тошкентга кундузги соат 12:00 да учиб келиш учун самолёт Истанбул халқаро аэропортидан ўша куни эрталаб соат 5:30 да учиб кетиши керак эди (Тошкент ва Истанбул ўртасидаги вақт фарқи 2 соатни ташкил этади). Бундай ҳолатда ходимга бу кун учун Туркия учун белгиланган меъёрлар бўйича кундалик харажатлар учун ҳақ тўланиши керак.

Туркиядан Тошкент шаҳрига авиаташиш учун авиачиптадаги маълумотларни ўрганиб чиқишни тавсия этамиз.