Қандай қилиб my.soliq.uz лозим даражада эҳтиёткорликка ёрдам беради

Солиқ қўмитаси солиқ тўловчи шахсий кабинетининг функционали контрагентларни танлашда лозим даражада эҳтиёткорлик қилишга ёрдам бериши мумкинлигини эслатиб ўтди. My.soliq.uzда солиқ узилишига таъсир кўрсатадиган кўрсаткичлар бўйича маълумот мавжуд. 

Buxgalter.uz тафсилотларни аниқлаштирди:

– “Солиқ узилиши” солиқ тўловчи солиқ ҳисоботида мазкур операциялар бўйича:

• ҚҚСни бюджетга тўламаган;
• ЭҲФда ушбу операцияларни нотўғри акс эттирган;
• солиқ органларига солиқ ҳисоботини тақдим этмаган етказиб берувчилар-контрагентлардан олинган ЭҲФ асосида ҳисобга олиниши лозим бўлган ҚҚС суммасини солиқ ҳисоботида акс эттирган пайтда пайдо бўлади.

Кўрсатилганлардан бири ёки – биргаликда бир нечта омил содир бўлиши мумкин.

Солиқ узилишини аниқлаш мақсадида ҳаракатлари келишилган (ҳуқуқий, иқтисодий ёки бошқа назорат остидаги) деб тавсифланадиган, товарлар (хизматлар)ни етказиб беришнинг бутун занжири бўйича иккинчи, учинчи ва кейинги бўғин контрагентлари томонидан бюджетга ҚҚС тўланмаганлиги ҳам ҳисобга олинади.

Узилиш коэффициенти тўғрисидаги умумий маълумотни ЭҲФда – томонлар реквизитлари остида кўриш мумкин (энг ишончли контрагентлар яшил рангда, энг “хавфли”лари – тўқ қизил рангда белгиланган). Рангли белгига “ёйилма”ни олиш учун:

1) порталнинг бош саҳифасида чап устунда “ҚҚС тўловчиларини аниқлаш” бўлимига киринг;

2) “Солиқ узилиши” иловасини танланг, солиқ тўловчининг ЭРИсини танланг, ЭРИ паролини киритинг.

Сизнинг олдингизда кўрсаткичларингиз, экраннинг қуйи қисмида эса – контрагентлар тўғрисида маълумот очилади.

Солиқ органлари битимларнинг ҳақиқатда амалга оширилишини текширади. Шу боис шартнома тузишдан олдин контрагентда битим бўйича мажбуриятларини бажариш учун имкониятлари ва ресурслари мавжудлигига ишонч ҳосил қилинг. Агар солиқ органи битим “хўжакўрсин”га расмийлаштирилганлиги, товар ёки хизмат эса ҳақиқатда шартнома тузилган шахсдан олинмаганлигини аниқласа, ҚҚСни ҳисобга олишда рад этилади.

Кўп бухгалтерлар 2018 йил 26 декабрдаги ПҚ-4086-сон қарор буни талаб қилганидек, контрагент ҳисобга қўйилган ёки қўйилмаганлигини текшириш билан чекланишади ва улар лозим даражада эҳтиёткорлик қилинган деб ҳисоблашади. Аммо бу  етарли эмас.

Солиқ қўмитаси ҳар бир корхонага ўзига хос хусусиятларини ҳисобга олган ҳолда, компания мансабдор шахсларининг изчил ҳаракатлари мажмуини ўз ичига олган контрагентларни текшириш бўйича ўз тизимини ишлаб чиқишини тавсия қилади.

Қуйидагилар ҳамкорнинг ишончлилиги ва сизнинг эҳтиёткорлигингиздан далолат беради:

• компания-етказиб берувчи ва компания-харидор раҳбариятининг етказиб бериш шартларини муҳокама қилиш ва шартномаларни имзолашда шахсий мулоқоти;
• компания-контрагент раҳбарининг  ҳужжат билан тасдиқланган ваколатлари ва унинг шахсини тасдиқловчи ҳужжат нусхасининг мавжудлиги;
• контрагентнинг ҳақиқатда жойлашган жойи, унинг омбор, ишлаб чиқариш ёки савдо майдонлари тўғрисида маълумот;
• контрагентларни излаш ва танлашнинг қайд этилганлиги: сайтлар ёки босма материалларга ҳаволалар, шунга ўхшаш (шу каби) товарлар ва хизматлар билан бозорнинг бошқа иштирокчилари, шу жумладан – уларни анча арзон нархда таклиф қилаётган иштирокчилар тўғрисида фойдаланишга рухсат этилган маълумот мавжуд бўлганда контрагент тўғрисида маълумотлар олиш усули тўғрисида ҳужжатларнинг мавжудлиги;
• контрагентда шартнома мажбуриятларини бажариш учун ресурсларнинг мавжудлиги (ишлаб чиқариш қувватлари, ускуналар, малакали ходимлар).

Манбага қаранг.

Олег ГАЕВОЙ тайёрлади