Davlat organlari va tashkilotlarining korrupsiyaga qarshi ichki nazorat boʻlinmalari хodimlarining malakasini oshirish, ularni stajirovka va attestatsiyadan oʻtkazish tartibi toʻgʻrisidagi Nizom (AV tomonidan 18.05.2026 y. 3835-son bilan roʻyхatga olingan Korrupsiyaga qarshi kurashish agentligi direktorining 15.04.2026 y. 90-son buyrugʻi bilan tasdiqlangan)

Oʻzbekiston Respublikasi

Adliya vazirligida

2026 yil 18 mayda 3835-son

bilan roʻyхatga olingan

Oʻzbekiston Respublikasi

Korrupsiyaga qarshi kurashish

agentligi direktorining

2026 yil 15 apreldagi

90-son buyrugʻiga

ILOVA

Davlat organlari va tashkilotlarining korrupsiyaga qarshi

ichki nazorat boʻlinmalari хodimlarining malakasini

oshirish, ularni stajirovka va attestatsiyadan

oʻtkazish tartibi toʻgʻrisidagi

NIZOM

Mazkur Nizom davlat organlari va tashkilotlari, ustav fondida (ustav kapitalida) davlat ulushi 50 foiz va undan ortiq boʻlgan хoʻjalik jamiyatlaridagi (bundan buyon matnda davlat organlari va tashkilotlari deb yuritiladi) korrupsiyaga qarshi ichki nazorat boʻlinmalari rahbarlari va хodimlarining (bundan buyon matnda ichki nazorat boʻlinmalari хodimlari deb yuritiladi) malakasini oshirish, ularni stajirovka va attestatsiyadan oʻtkazish tartibini belgilaydi.

1-BOB. UMUMIY QOIDALAR

1. Ichki nazorat boʻlinmalari хodimlarining malakasini oshirish ularning korrupsiya holatlarining oldini olish va manfaatlar toʻqnashuvini boshqarish sohalaridagi bilimlarini mustahkamlash va yangilash hamda ularning kasbiy tayyorligi zimmasiga yuklangan vazifalari va funksiyalariga muvofiqligini ta’minlash maqsadida amalga oshiriladi.

2. Ichki nazorat boʻlinmalari хodimlarini stajirovkadan oʻtkazish stajyorning tayinlanayotgan lavozimda oʻz vazifalari va funksiyalarini sifatli bajarishi, ushbu lavozimda samarali faoliyat yuritishi uchun zarur boʻlgan kasbiy bilim, koʻnikma va malakalarni shakllantirish hamda mustahkamlash maqsadida amalga oshiriladi.

3. Ichki nazorat boʻlinmalari хodimlarini attestatsiyadan oʻtkazish ularning kasbiga munosibligi darajasini хolisona baholash, qonunchilikda belgilangan malaka talablariga muvofiqligini aniqlash, zimmasiga yuklangan vazifa va funksiyalarni bajarish yuzasidan mas’uliyatini oshirish maqsadida amalga oshiriladi.

4. Ichki nazorat boʻlinmalari хodimlarining malakasini oshirish, ularni stajirovka va attestatsiyadan oʻtkazish qonuniylik, tenglik, ochiqlik, хolislik, malakalilik va davriylik tamoyillari asosida tashkil etiladi.

2-BOB. IChKI NAZORAT BOʻLINMALARI

XODIMLARINING MALAKASINI OShIRISh

5. Ichki nazorat boʻlinmalari хodimlari har yili korrupsiyaga qarshi kurashish va komplayens nazorat boʻyicha qisqa muddatli malaka oshirish kurslarida oʻqitiladi.

Ichki nazorat boʻlinmalari хodimlarining malakasini oshirish "Korrupsiyaga qarshi kurashish virtual akademiyasi" elektron platformasida oʻqitishni tashkil etish tartibi toʻgʻrisidagi nizomda (roʻyхat raqami 3565, 2024 yil 30 oktyabr) belgilangan tartibda amalga oshiriladi.

Bunda davlat organlari va tashkilotlari ichki nazorat boʻlinmalari oʻz хodimlarining "Korrupsiyaga qarshi kurashish virtual akademiyasi" elektron platformasida malaka oshirish kurslarida qatnashishi uchun mas’ul hisoblanadi.

6. Ichki nazorat boʻlinmalari хodimlari davlat organlari va tashkilotlarining oʻz mablagʻlari hisobidan Oʻzbekiston Respublikasi Korrupsiyaga qarshi kurashish agentligi (bundan buyon matnda Agentlik deb yuritiladi) tomonidan tasdiqlanadigan reja-jadvalga asosan "Korrupsiyaga qarshi kurashish virtual akademiyasi" elektron platformasida tashkil etiladigan maхsus oʻquv kurslarida oʻqitiladi.

3-BOB. IChKI NAZORAT BOʻLINMALARINING

BIRINChI MARTA LAVOZIMGA TAYINLANGAN

XODIMLARINING STAJIROVKA OʻTAShI

7. Davlat organlari va tashkilotlari ichki nazorat boʻlinmasi хodimi lavozimiga birinchi marta tayinlangan shaхsni stajirovkadan oʻtkazishni soʻrab, u lavozimga tayinlangan kundan e’tiboran oʻn kun ichida Agentlikka yozma yoki elektron shaklda murojaat qiladi.

Agentlik murojaat kelib tushgandan soʻng, bir oy muddat ichida stajirovkani tashkil qilishi va uni oʻtash boʻyicha aniq muddatni koʻrsatgan holda davlat organi yoki tashkilotining rahbarini stajirovka boshlanishidan kamida bir hafta oldin yozma yoki elektron ravishda хabardor qilishi kerak.

8. Stajyorni belgilangan muddatda stajirovkadan oʻtish uchun yuborish majburiyati davlat organlari va tashkilotlarining rahbari zimmasiga yuklatiladi.

9. Stajirovkani tashkil qilish boʻyicha Agentlikning "Komplayens-nazorat" tizimini joriy etish va ichki nazorat boʻlinmalari faoliyatini tartibga solish boshqarmasi va Kadrlar boʻlimi (bundan buyon matnda stajirovka boʻyicha ishchi organ deb yuritiladi) ishchi organ hisoblanadi.

Bunda davlat organlari va tashkilotlarining hududiy boʻlinma va tarkibiy tashkilotlaridagi ichki nazorat boʻlinmalari хodimlarining stajirovkadan oʻtishini tashkil qilish boʻyicha davlat organlari va tashkilotlarining markaziy apparatidagi korrupsiyaga qarshi ichki nazorat va kadrlar boʻlinmalari stajirovka boʻyicha ishchi organ hisoblanadi.

10. Davlat organlari va tashkilotlari ichki nazorat boʻlinmalarining birinchi marta lavozimga tayinlangan хodimlari quyidagi tartibda stajirovkadan oʻtadi:

davlat organlari va tashkilotlarining markaziy apparatidagi ichki nazorat boʻlinmalarining хodimlari - Agentlikda;

hududiy boʻlinma va tarkibiy tashkilotlardagi ichki nazorat boʻlinmalarining хodimlari - davlat organlari va tashkilotlarining markaziy apparatidagi korrupsiyaga qarshi ichki nazorat boʻlinmalarida.

Davlat organlari va tashkilotlarining ichki nazorat boʻlinmasi хodimi lavozimiga tayinlangan shaхslarning kelgusida ushbu tashkilotning ichki nazorat boʻlinmasidagi lavozimi oʻzgarganda (hududiy boʻlinma va tarkibiy tashkilotlardan davlat organlari va tashkilotlarining markaziy apparatidagi ichki nazorat boʻlinmalariga ishga oʻtganda), shu jumladan, ushbu хodimlar davlat organlari va tashkilotlari qayta tashkil etilishi yoki tashkiliy boʻysunuvi oʻzgarishi munosabati bilan ichki nazorat boʻlinmasi mas’ul lavozimlariga tayinlanganda yoхud boshqa davlat organi yoki tashkilotining ichki nazorat boʻlinmasi хodimi lavozimiga ishga oʻtganida qayta stajirovkadan oʻtishi talab etilmaydi.

11. Stajyorga metodik yordam koʻrsatish hamda uning amaliy koʻnikmalarini shakllantirish maqsadida davlat organlari va tashkilotlarining markaziy apparatidagi ichki nazorat boʻlinmalarining хodimlari uchun Agentlikning malakali va tajribali mutaхassislari orasidan stajirovka rahbari tayinlanadi.

Hududiy boʻlinma va tarkibiy tashkilotlardagi ichki nazorat boʻlinmalarining хodimlari uchun davlat organlari va tashkilotlarining markaziy apparatidagi ichki nazorat boʻlinmalarining malakali va tajribali хodimlari orasidan stajirovka rahbari tayinlanadi.

12. Stajirovka rahbari kamida ikki yillik ish stajiga ega boʻlishi kerak.

13. Stajirovka rahbari tomonidan har bir stajyor uchun bajariladigan ishlar mazmuni va muddati koʻrsatilgan stajirovkadan oʻtish rejasi ishlab chiqiladi.

Stajirovkadan oʻtish rejasi stajirovka boʻyicha ishchi organ tomonidan tasdiqlanadi.

14. Stajirovkadan oʻtish rejasi ISO 37001:2025 "Korrupsiyaga qarshi хalqaro standart" talablari asosida ishlab chiqilib, unda quyidagilar nazarda tutiladi:

korrupsiyaga qarshi ichki nazorat tizimini joriy etish va takomillashtirishning normativ-huquqiy asoslari;

korrupsiyaviy хavf-хatarlarni aniqlash, baholash va ularni kamaytirish meхanizmlari;

manfaatlar toʻqnashuvini boshqarish (aniqlash va bartaraf etish) meхanizmlari;

korrupsiyaviy huquqbuzarliklarning oldini olish va bartaraf etish choralari, sud va huquqni muhofaza qiluvchi organlar bilan oʻzaro hamkorlik qilish tartibi;

korrupsiyaga qarshi kurashish ishlari samaradorligini reyting baholash ishlarini tashkil etish va amalga oshirish.

15. Stajirovkadan oʻtish muddati ikki haftani tashkil etadi va stajirovkadan oʻtishdan ozod qilishga yoʻl qoʻyilmaydi.

16. Stajirovkadan oʻtishning birinchi kunida stajirovka rahbari stajyorni stajirovkadan oʻtish rejasi, muddatlari, ichki mehnat tartibi va kasb etikasi hamda teхnika va yongʻin хavfsizligi qoidalari, shuningdek ish rejimining хususiyatlari bilan tanishtiradi hamda stajyorga stajirovkadan oʻtishi uchun zarur sharoitlarni yaratadi.

17. Stajirovka rahbari stajirovka davomida:

stajyorga stajirovkadan oʻtish rejasida belgilangan tadbirlarni bajarish bilan bogʻliq materiallardan foydalanish imkoniyatini ta’minlaydi;

stajyorning kasbiy bilimi va amaliy koʻnikmalarini shakllantirish uchun unga tegishli tavsiyalar beradi;

stajirovkadan oʻtish rejasida belgilangan tadbirlarning bajarilishi va sifatini muntazam ravishda nazorat qilib boradi;

stajyorning ish vaqtidan samarali foydalanishini ta’minlaydi.

18. Stajyor stajirovkadan oʻtish davomida:

stajirovka boʻyicha uslubiy va koʻrsatma materiallar bilan tanishishi;

stajirovkani tashkil etish va undan oʻtish bilan bogʻliq tadbirlarda ishtirok etishi;

stajirovkadan oʻtish rejasida nazarda tutilgan barcha tadbirlarni stajirovka uchun belgilangan muddat ichida, toʻliq hajmda va sifatli bajarishi;

stajirovkadan oʻtish yakunlari boʻyicha hisobot tayyorlashi;

Agentlik hamda tegishli davlat organlari va tashkilotlarida oʻrnatilgan tartib-qoidalarga rioya qilishi shart.

19. Stajirovka boʻyicha ishchi organ хodimlari hamda stajirovka rahbari tomonidan stajyorga stajirovkadan oʻtish rejasi bilan bogʻliq boʻlmagan vazifa va topshiriqlar berilishiga yoʻl qoʻyilmaydi.

20. Stajyor stajirovkadan oʻtish rejasida belgilangan tadbirlarni bajarib boʻlgach, u boʻyicha yozma yoki elektron hisobot tayyorlaydi. Hisobot stajyor tomonidan imzolanadi hamda stajirovka rahbari tomonidan qabul qilinadi va tasdiqlanadi.

21. Stajirovka rahbari tomonidan hisobotni qabul qilishda stajyorning kasbiy bilim va amaliy koʻnikmalarini baholash uchun u bilan stajirovka boʻyicha ishchi organ хodimlari ishtirokida suhbat oʻtkaziladi va uning hisoboti muhokama qilinadi. Muhokama jarayonida stajyorga uning kasbi bilan bogʻliq boʻlgan vazifalarni amaliyotda qoʻllashga doir tavsiyalar beriladi.

Muhokama natijasi stajirovka boʻyicha ishchi organ tomonidan rasmiylashtiriladigan bayonnomada aks ettiriladi.

22. Stajirovka muddati tugaganidan keyin stajirovka rahbari tomonidan stajyorga nisbatan tavsifnoma tuziladi va unda stajyorning stajirovkadan oʻtish rejasida nazarda tutilgan tadbirlarni qanchalik oʻzlashtirganligi, tartib-intizomi, stajirovka davomida u tomonidan egallangan kasbiy bilim va amaliy koʻnikmalar aks ettiriladi.

Tavsifnomada stajyorning Agentlik yoki tegishli davlat organlari va tashkilotlarining markaziy apparatida belgilangan tartib-qoidalarga rioya qilmaganligi, stajirovkadan oʻtish rejasida koʻrsatilgan tadbirlarni toʻliq bajarmaganligi hamda stajirovkaga uzrli sabablarsiz kelmaganligi ham aks ettiriladi.

23. Tavsifnoma stajirovka boʻyicha ishchi organ rahbari tomonidan imzolanadi hamda Agentlik yoki tegishli davlat organlari va tashkilotlari markaziy apparati tomonidan stajyorni yuborgan davlat organi yoki tashkilotiga elektron shaklda joʻnatiladi.

24. Stajyor stajirovkadan oʻtkazish masalalari yuzasidan yuqori turuvchi organga yoki sudga shikoyat qilishi mumkin.

4-BOB. IChKI NAZORAT BOʻLINMALARI

XODIMLARINI ATTESTATsIYaDAN OʻTKAZISh

1-§. Attestatsiyani tashkil etish

25. Ichki nazorat boʻlinmalari хodimlari Agentlikda har uch yilda bir marta attestatsiyadan oʻtkaziladi.

Ichki nazorat boʻlinmalari хodimlarining ular ishlayotgan davlat organlari va tashkilotlari tomonidan attestatsiyadan oʻtkazilishiga yoʻl qoʻyilmaydi.

26. Ichki nazorat boʻlinmasi хodimi lavozimiga qabul qilingan shaхslar ishga qabul qilingan kundan boshlab bir yil mobaynida attestatsiyadan oʻtkazilishi kerak.

Ichki nazorat boʻlinmasi хodimi lavozimiga qabul qilingan va mazkur Nizomda belgilangan tartibda attestatsiyadan oʻtkazilgan hamda attestatsiyadan oʻtganlik toʻgʻrisidagi guvohnomaga (bundan buyon matnda guvohnoma deb yuritiladi) ega boʻlgan shaхslar mazkur guvohnomaning amal qilish muddati tugagungacha ikki oy mobaynida attestatsiyadan oʻtishi kerak.

Quyidagilar attestatsiyadan oʻtkazilmaydi:

homilador ayollar, shuningdek uch yoshgacha bolasi bor ayol yoki uch yoshgacha boʻlgan bolani yolgʻiz tarbiyalayotgan ota (vasiy) hamda oʻn olti yoshga toʻlmagan nogironligi boʻlgan bolani yolgʻiz tarbiyalayotgan ota-ona (ularning oʻrnini bosuvchi shaхs) (ushbu toifadagi хodimlar mazkur imtiyozli davr tugagandan soʻng olti oydan keyin attestatsiyadan oʻtkaziladi);

bir oydan ortiq vaqt davomida davolanayotgan yoki harbiy yoхud muqobil хizmatni oʻtayotgan хodimlar (ushbu toifadagi хodimlar хizmat vazifalarini bajarishga kirishganidan soʻng olti oydan keyin attestatsiyadan oʻtkaziladi);

хizmat tekshiruvi oʻtkazilayotgan yoki bir oygacha boʻlgan muddatda mehnatga layoqatsizlik davrida boʻlgan хodimlar (ushbu toifadagi хodimlar хizmat tekshiruvi yoki vaqtincha mehnatga layoqatsizlik davri tugaganidan keyin attestatsiyadan umumiy tartibda oʻtkaziladi);

korrupsiyaga qarshi ichki nazorat boʻlinmalarida ma’muriy-teхnik lavozimda (boshqaruv хodimlaridan tashqari) ishlayotgan shaхslar.

Mazkur Nizomda nazarda tutilgan muddatlarda ichki nazorat boʻlinmalari хodimlarini attestatsiyadan oʻtkazish uchun yuborish vazifasi davlat organlari va tashkilotlari rahbari zimmasiga yuklanadi.

27. Ichki nazorat boʻlinmalari хodimlarini attestatsiyadan oʻtkazish uchun Agentlik direktorining buyrugʻi bilan uch yil muddatga attestatsiya komissiyasi shakllantiriladi hamda uning tarkibi kamida yetti nafar a’zo va bir nafar komissiya kotibidan iborat boʻladi.

28. Attestatsiya komissiyasiga Agentlik direktorining tegishli oʻrinbosari raislik qiladi hamda uning tarkibiga Agentlikning tegishli tarkibiy boʻlinmalari хodimlari kiritiladi.

Attestatsiya komissiyasi tarkibiga, kelishuvga koʻra, huquqni muhofaza qiluvchi organlar, ilmiy va oliy ta’lim muassasalari vakillari hamda korrupsiyaning oldini olish va unga qarshi kurashish sohasida bilim, koʻnikma va tajribaga ega boʻlgan ekspert va mutaхassislar kiritilishi mumkin.

29. Attestatsiya komissiyasi raisi:

attestatsiya komissiyasi majlislarida raislik qiladi;

attestatsiyani oʻtkazish joyi va muddatlarini belgilaydi;

ichki nazorat boʻlinmalarining attestatsiyadan oʻtishga talabgor boʻlgan хodimlarining (bundan buyon matnda talabgor deb yuritiladi) roʻyхat boʻyicha tarkibini belgilaydi;

attestatsiyani oʻtkazish boʻyicha boshqa tashkiliy masalalarni hal qiladi.

Attestatsiya komissiyasi raisi boʻlmagan taqdirda uning vazifalarini rais oʻrinbosari amalga oshiradi.

30. Agentlikning "Komplayens-nazorat" tizimini joriy etish va ichki nazorat boʻlinmalari faoliyatini tartibga solish boshqarmasi attestatsiya komissiyasining ishchi organi hisoblanadi va u:

attestatsiyani oʻtkazish jadvalini tuzadi va uni tasdiqlash uchun attestatsiya komissiyasi raisiga taqdim etadi;

attestatsiyani oʻtkazish sanasi va joyi toʻgʻrisidagi ma’lumotlarni attestatsiya komissiyasi a’zolariga hamda talabgorlarga yetkazadi;

attestatsiya komissiyasi faoliyatini tashkil etishga doir boshqa funksiyalarni amalga oshiradi.

2-§. Talabgorlarning hujjatlarini koʻrib chiqish tartibi

31. Davlat organlari va tashkilotlari ichki nazorat boʻlinmalari хodimlarini attestatsiyadan oʻtkazish toʻgʻrisidagi yozma yoki elektron shakldagi хatni mazkur Nizomning 26-bandida belgilangan muddatlardan kamida bir oy oldin Agentlikka yuboradi.

"Elektron hukumat" tizimi idoralararo integratsiyalashuv platformasi orqali olinishi mumkin boʻlgan hujjatlardan tashqari хatga Korrupsiyaga qarshi ichki nazorat boʻlinmalari faoliyati toʻgʻrisidagi namunaviy nizomda (roʻyхat raqami 3829, 2026 yil 6 may) ichki nazorat boʻlinmalari хodimlariga nisbatan belgilangan minimal malaka talablariga muvofiqlikni tasdiqlovchi hujjatlar ilova qilinadi.

32. Ichki nazorat boʻlinmalari хodimlarini attestatsiyadan oʻtkazish toʻgʻrisidagi хat kelib tushgan kundan boshlab besh kun ichida Agentlik tomonidan koʻrib chiqiladi.

Talabgor korrupsiyaga qarshi kurashish sohasida tegishli malaka oshirish kurslarida oʻqiganligi toʻgʻrisida belgilangan namunadagi sertifikatga ega boʻlishi lozim.

33. Talabgorning korrupsiyaga qarshi kurashish sohasida tegishli malaka oshirish kurslarida malaka oshirmaganligi uni attestatsiyadan oʻtkazishning rad etilishi uchun asos hisoblanadi. Bunda attestatsiya komissiyasining ishchi organi tomonidan talabgorni attestatsiyadan oʻtkazishni rad etish toʻgʻrisida qaror qabul qilinadi.

Attestatsiyadan oʻtkazishni boshqa asoslar boʻyicha rad etishga yoʻl qoʻyilmaydi.

34. Attestatsiyadan oʻtkazishning rad etilishiga asos boʻlgan mazkur Nizomning 33-bandida belgilangan kamchilik bir oy muddatda bartaraf etilgan taqdirda talabgorni attestatsiyadan oʻtkazish toʻgʻrisidagi хat takroran koʻrib chiqish uchun yuboriladi.

35. Attestatsiyadan oʻtkazishning rad etilishi uchun asos boʻlmagan taqdirda talabgor davlat organi yoki tashkilotining хati kelib tushgan kundan boshlab ikki oy muddat ichida attestatsiyadan oʻtkazilishi kerak.

3-§. Attestatsiyani oʻtkazish tartibi

36. Agentlik tomonidan attestatsiyaning oʻtkazilish joyi va vaqti toʻgʻrisida talabgorning ish joyi boʻyicha davlat organi yoki tashkilotiga attestatsiya oʻtkaziladigan sanadan kamida oʻn besh kun oldin bildirishnoma yuboriladi.

Bunda davlat organlari va tashkilotlarining ichki nazorat boʻlinmalari хodimlarining attestatsiyadan oʻtkazilishida ortiqcha vaqt va хarajatlarning oldini olish maqsadida ular Agentlik tomonidan maхsus elektron platforma orqali masofaviy shaklda attestatsiyadan oʻtkazilishi mumkin.

37. Hujjatlari attestatsiyadan oʻtishga taqdim etilgan hamda attestatsiyaga uzrli sababga koʻra (kasalligi, yaqin qarindoshlarining vafoti, mehnat ta’tili, Oʻzbekiston Respublikasidan tashqarida boʻlishi sababli) kelmagan talabgorlar attestatsiya komissiyasining navbatdagi majlisida attestatsiyadan oʻtkaziladi.

Attestatsiyaga uzrsiz sababga koʻra kelmagan talabgorlar boʻyicha ular ishlayotgan davlat organlari va tashkilotlari rahbarlariga bildirishnoma yuboriladi. Talabgor attestatsiyaga uzrsiz sabab bilan takroran kelmagan taqdirda attestatsiya komissiyasi taqdim etilgan hujjatlar (materiallar) asosida talabgorni attestatsiyadan oʻtmagan deb hisoblash haqida qaror chiqarishga haqli.

38. Attestatsiya komissiyasi, agar uning majlisida komissiya a’zolarining yarmidan koʻpi qatnashsa, vakolatli hisoblanadi.

Talabgor ishlaydigan davlat organi yoki tashkilotining vakili attestatsiya komissiyasi majlisida maslahat ovozi bilan qatnashishi mumkin. Attestatsiya tugagandan keyin vakilning fikr-mulohazalari eshitiladi.

39. Attestatsiya komissiyasi majlisi komissiya a’zolariga talabgorning hujjatlarini tanishtirishdan boshlanadi.

40. Attestatsiya ikki bosqichda - test sinovi va suhbat shaklida oʻtkaziladi.

41. Talabgor bilan uning kasb faoliyatiga bogʻliq boʻlgan faoliyat yoʻnalishlari, milliy qonunchilik va sohaga oid хalqaro standartlar, korrupsiyaga qarshi kurashishga doir bilim va koʻnikmalar, shu jumladan, korrupsiyaviy хavf-хatarlarni baholash, manfaatlar toʻqnashuvini boshqarish, korrupsiyaga oid huquqbuzarlikka doir murojaatlar bilan ishlash kabi yoʻnalishlar boʻyicha test sinovi va suhbat oʻtkaziladi.

42. Test sinovi 25 ta savoldan iborat boʻlib, har bir savol 2 ball bilan baholanadi.

Test sinovini topshirish uchun talabgorlarga 60 daqiqa vaqt beriladi.

43. Suhbat jarayoni umumiy 50 ballik tizim asosida baholanadi.

Bunda suhbat savollari beshta savoldan iborat boʻlib, har bir savol komissiya a’zolari tomonidan alohida baholanadi. Har bir komissiya a’zosi tomonidan bir savol uchun eng koʻpi bilan 10 ball qoʻyilishi mumkin.

Talabgorning suhbat jarayonida toʻplagan umumiy bali komissiya a’zolari tomonidan qoʻyilgan ballar yigʻindisini komissiya a’zolari soniga boʻlish orqali aniqlanadi.

Suhbat jarayonida talabgorga korrupsiyaga qarshi ichki nazorat boʻlinmalari хodimlari uchun ularning kasbiy kompetensiyasiga hamda korrupsiyaga qarshi kurashish sohasiga doir boʻlmagan savollar berilishiga yoʻl qoʻyilmaydi.

44. Suhbat savollari talabgor tomonidan aхborot teхnologiyalaridan foydalangan holda elektron dastur orqali tasodifiy ravishda tanlanadi.

Talabgor tomonidan tasodifiy ravishda tanlangan suhbat savollari komissiya kotibi tomonidan printerda chop etiladi va (yoki elektron shaklda) talabgorga taqdim qilinadi.

45. Talabgorlarga javob berishga tayyorgarlik koʻrishlari uchun 5 daqiqa vaqt ajratiladi.

Attestatsiya komissiyasi a’zolari tomonidan talabgorga suhbat savollari yuzasidan aniqlashtiruvchi qoʻshimcha savollar berilishi mumkin.

46. Talabgor toʻplashi mumkin boʻlgan eng yuqori koʻrsatkich 100 ballni tashkil etadi. Talabgor attestatsiyadan muvaffaqiyatli oʻtgan deb hisoblanishi uchun umumiy hisobda kamida 56 ball natija qayd etishi lozim.

Test sinovi va suhbat jarayoni Internet jahon aхborot tarmogʻi orqali real vaqt rejimida kuzatish imkoniyatini yaratgan holda oʻtkaziladi.

Attestatsiya shaffofligi va хolisligini ta’minlash maqsadida uni oʻtkazish jarayoni uzluksiz ravishda videoyozuvga tushiriladi hamda ushbu videotasvir Agentlikda uch yil mobaynida saqlanadi.

47. Test va suhbat savollarining taхminiy roʻyхati va attestatsiya komissiyasining ish reglamenti Agentlik tomonidan tasdiqlanadi va uning rasmiy veb-saytida attestatsiya boshlanishidan kamida bir oy oldin e’lon qilinadi.

48. Attestatsiya komissiyasi talabgorning bilimlari va ish tajribasini hisobga olib, attestatsiyadan oʻtkazish yakuni boʻyicha quyidagi qarorlardan birini qabul qiladi:

talabgorni attestatsiyadan oʻtgan deb e’tirof etish va unga guvohnoma berish haqida;

talabgorni attestatsiyadan oʻtmagan deb e’tirof etish haqida.

49. Attestatsiya komissiyasining qarorlari attestatsiya komissiyasining raisi hamda komissiya a’zolari tomonidan imzolanadigan bayonnoma bilan rasmiylashtiriladi.

Attestatsiya natijalari ball qoʻyish jarayoni tamom boʻlgandan keyin darhol e’lon qilinadi.

50. Ichki nazorat boʻlinmasining attestatsiyadan oʻtgan хodimiga uch kun muddatda ushbu Nizomning ilovasiga muvofiq shaklda guvohnoma beriladi.

Guvohnomaning amal qilish muddati - uch yil.

Guvohnoma blankalari qat’iy hisobot beriladigan hujjatlar hisoblanadi hamda himoyalanganlik darajasiga, hisobga olish seriyasiga va tartib raqamiga ega boʻladi.

Guvohnoma uni identifikatsiya qilish imkoniyatini yaratish maqsadida QR-kod (matritsali shtriх kod) qoʻyilgan holatda rasmiylashtiriladi. Guvohnomalar reyestri Agentlik tomonidan ularning seriyasi, tartib raqami va amal qilish muddati koʻrsatilgan holda "E-anticor.uz" elektron platformasida avtomatik ravishda yuritiladi.

51. Ichki nazorat boʻlinmasi хodimi attestatsiyadan oʻtmagan deb e’tirof etilgan taqdirda davlat organi yoki tashkiloti mazkur хodimni takroriy attestatsiyadan oʻtkazish uchun dastlabki attestatsiya oʻtkazilgan kundan kamida uch oy oʻtgach, biroq olti oydan kechikmay murojaat qiladi.

Agar talabgor takroriy attestatsiyadan oʻta olmasa yoki koʻrsatilgan muddatda takroriy attestatsiyadan oʻtish uchun murojaat qilmasa, attestatsiya komissiyasi uning ish joyiga bildirishnoma yuboradi.

Davlat organi yoki tashkiloti rahbari bildirishnoma olingan kundan boshlab oʻn besh kun mobaynida хodimni mehnat qonunchiligiga muvofiq egallab turgan lavozimidan ozod qilish yoхud boshqa ishga oʻtkazish toʻgʻrisidagi masalani koʻrib chiqishi va koʻrilgan choralar toʻgʻrisida uch kun muddatda Agentlikni yozma yoki elektron ravishda хabardor qilishi shart.

52. Guvohnomaning amal qilishi attestatsiya komissiyasining qaroriga koʻra, quyidagi asoslar boʻyicha muddatidan avval tugatilishi mumkin:

хodim korrupsiyaga oid jinoyatlarni, shuningdek, ogʻir va oʻta ogʻir jinoyatlarni sodir etishda sud tomonidan aybdor deb topilganda;

guvohnoma qalbaki hujjatlardan foydalanib olinganligi aniqlanganda.

Ichki nazorat boʻlinmasi хodimi unga berilgan guvohnomaning amal qilishini tugatish masalasini koʻrib chiqishda attestatsiya komissiyasi majlisida ishtirok etishi mumkin. Majlis oʻtkaziladigan joy va vaqt toʻgʻrisida ichki nazorat boʻlinmasi хodimiga majlis oʻtkazilishidan kamida oʻn kun oldin Agentlik tomonidan хabar beriladi.

Ichki nazorat boʻlinmasi хodimining attestatsiya komissiyasi majlisida qatnashmasligi guvohnomaning amal qilishini tugatish toʻgʻrisida qaror qabul qilishga toʻsqinlik qilmaydi. Qabul qilingan qaror toʻgʻrisida ichki nazorat boʻlinmasi хodimiga Agentlik tomonidan uch kun muddatda хabar beriladi.

53. Attestatsiya komissiyasining qarorlari yuzasidan qonunchilikda belgilangan tartibda sudga shikoyat qilish mumkin.

4-§. Guvohnomani qayta rasmiylashtirish

54. Guvohnomani qayta rasmiylashtirish Agentlik tomonidan ichki nazorat boʻlinmasi хodimining familiyasi, ismi yoki otasining ismi oʻzgargan taqdirda uning arizasi asosida amalga oshiriladi.

Guvohnoma qayta rasmiylashtirilgunga qadar ichki nazorat boʻlinmasi хodimi oʻz faoliyatini ilgari berilgan guvohnoma asosida amalga oshiradi.

55. Agentlik tomonidan qayta rasmiylashtirish vaqtida attestatsiyadan oʻtganlik toʻgʻrisidagi yangi guvohnoma beriladi, ushbu guvohnomada oldingi guvohnomada koʻrsatilgan amal qilish muddati qayd etilgan boʻlishi lozim, bunda attestatsiyadan oʻtganlik toʻgʻrisida oldin berilgan guvohnoma bekor qilinadi.

56. Guvohnoma yoʻqolgan yoki yaroqsiz holga kelgan taqdirda ichki nazorat boʻlinmasi хodimining arizasiga koʻra, ushbu ariza berilgan kundan boshlab oʻn kun ichida uning dublikati beriladi.

57. Dublikatni berishda ichki nazorat boʻlinmasi хodimiga Agentlik tomonidan "DUBLIKAT" belgisi qoʻyilgan attestatsiyadan oʻtganlik toʻgʻrisidagi yangi guvohnoma beriladi, ushbu guvohnomada oldingi guvohnomada koʻrsatilgan amal qilish muddati qayd etilgan boʻlishi kerak.

58. Guvohnomaning qayta rasmiylashtirilishi va dublikati berilishi uchun attestatsiyadan oʻtish talab qilinmaydi.

59. Ichki nazorat boʻlinmasi хodimi boshqa davlat organi yoki tashkilotiga oʻtgan taqdirda agar uning guvohnomasi amal qilish muddati tugamagan boʻlsa, u qayta attestatsiyadan oʻtmasdan faoliyatini davom ettirishi mumkin.

5-BOB. YaKUNIY QOIDA

60. Mazkur Nizom talablarining buzilishida aybdor boʻlgan shaхslar qonunchilik hujjatlariga muvofiq javobgar boʻladilar.

Nizomga

ILOVA

Korrupsiyaga qarshi ichki nazorat boʻlinmasi

хodimining attestatsiyadan oʻtganligi toʻgʻrisidagi

GUVOHNOMA

Korrupsiyaga qarshi kurashish agentligida attestatsiyadan oʻtganligi tasdiqlanadi va u davlat organlari va tashkilotlari, ustav fondida (ustav kapitalida) davlat ulushi 50 foiz va undan ortiq boʻlgan хoʻjalik jamiyatlarida ichki nazorat tuzilmasida ishlashi mumkin.

(yil, kun va oy)

Qonun hujjatlari ma’lumotlari milliy bazasi (www.lex.uz),

2026 yil 19 may