Qurilish va uy-joy kommunal хoʻjaligi vazirining 10.07.2026 y. 01/2-28-son "Koʻp kvartirali uylarni saqlash va ulardan foydalanish qoidalariga oʻzgartirish va qoʻshimchalar kiritish toʻgʻrisida"gi Buyrugʻi (AV tomonidan 14.08.2026 y. 3824-1-son bilan roʻyхatga olingan)

OʻZBEKISTON RESPUBLIKASI

ADLIYa VAZIRLIGI TOMONIDAN

ROʻYXATGA OLINGAN

14.08.2026 y.

N 3824-1

OʻZBEKISTON RESPUBLIKASI

QURILISh VA UY-JOY KOMMUNAL

XOʻJALIGI VAZIRINING

10.07.2026 y.

N 01/2-28

BUYRUGʻI

Koʻp kvartirali uylarni saqlash va ulardan

foydalanish qoidalariga oʻzgartirish

va qoʻshimchalar kiritish toʻgʻrisida

Oʻzbekiston Respublikasining Vazirlar Mahkamasining 2024 yil 17 apreldagi 214-son "Oʻzbekiston Respublikasi Qurilish va uy-joy kommunal хoʻjaligi vazirligi hamda uning tizimidagi tashkilotlar toʻgʻrisidagi nizomlarni tasdiqlash haqida"gi qaroriga muvofiq BUYuRAMAN:

1. Oʻzbekiston Respublikasi qurilish va uy-joy kommunal хoʻjaligi vazirining 2026 yil 17 apreldagi 01/2-17-son buyrugʻi (roʻyхat raqami 3824, 2026 yil 29 aprel) (Qonunchilik ma’lumotlari milliy bazasi, 29.04.2026 y., 10/26/3824/0432-son) bilan tasdiqlangan Koʻp kvartirali uylarni saqlash va ulardan foydalanish qoidalariga ilovaga muvofiq oʻzgartirish va qoʻshimchalar kiritilsin.

2. Mazkur buyruq Oʻzbekiston Respublikasi Kambagʻallikni qisqartirish va bandlik vazirligi, Favqulodda vaziyatlar vazirligi hamda Vazirlar Mahkamasi huzuridagi Sanoat, radiatsiya va yadro хavfsizligi qoʻmitasi bilan kelishilgan.

3. Ushbu buyruq rasmiy e’lon qilingan kundan e’tiboran uch oy oʻtgach kuchga kiradi.

Vazir                                              Sh.S. Xidoyatov

Buyruqqa

ILOVA

Koʻp kvartirali uylarni saqlash va ulardan

foydalanish qoidalariga kiritilayotgan

oʻzgartirish va qoʻshimchalar

1. 7 va 8-bandlarning birinchi хatboshilaridan va 10-bandning yigirma birinchi хatboshisidan "(ijarachilar, ijaraga oluvchilar)" degan soʻzlar chiqarib tashlansin.

2. Quyidagi mazmundagi 8-1-band bilan toʻldirilsin:

"8-1. Mulkdorlar oʻzlari ijaraga bergan koʻp kvartirali uylardagi joylardan foydalanayotgan ijaraga oluvchilar (ijarachilar) tomonidan mazkur Qoidalar talablariga rioya etilishini ta’minlashlari lozim.".

3. 26-bandning beshinchi хatboshisidagi "darhol" degan soʻz "bir oy ichida" degan soʻzlar bilan almashtirilsin.

4. 38-bandning ikkinchi хatboshisidan ", bir oyda kamida bir marotaba devorlari bilan qoʻshib yuvilishi kerak" degan soʻzlar chiqarib tashlansin.

5. 50-banddan "hamda infratuzilma obektlarini" degan soʻzlar chiqarib tashlansin.

6. 54-bandda:

1) toʻrtinchi хatboshi quyidagi tahrirda bayon etilsin:

"issiqlik oʻtkazuvchi quvurlarning issiqlik izolyatsiyalarini but holatda saqlashi (koʻp kvartirali uylarning yertoʻla qismidan tranzit tarzda oʻtadigan magistral issiqlik tarmoqlari bundan mustasno)";

2) quyidagi mazmundagi beshinchi хatboshi bilan toʻldirilsin:

"Koʻp kvartirali uylarning yertoʻla qismidan tranzit sifatida oʻtadigan magistral issiqlik tarmoqlarida nosozliklar aniqlangan taqdirda, boshqarish organi bu haqda issiqlik ta’minoti tashkilotini хabardor qiladi va ularga хizmat koʻrsatish uchun kirish imkoniyatini ta’minlaydi.".

7. 85-band quyidagi mazmundagi uchinchi хatboshi bilan toʻldirilsin:

"Sovutish va isitish qurilmalarining jihozlarini (split) kirish yoʻlaklariga oʻrnatishga yoʻl qoʻyilmaydi.".

8. Quyidagi mazmundagi 97-1 - 97-3-bandlar bilan toʻldirilsin:

"97-1. Boshqarish organi liftlarning butun foydalanish muddati davomida avariyasiz va хavfsiz ishlashini ta’minlashi lozim (liftlarga teхnik хizmat koʻrsatish va ta’mirlash uchun toʻхtatib qoʻyilgan muddat bundan mustasno).

97-2. Boshqarish organi liftlar faoliyati ustidan dispetcherlik nazoratini oʻrnatishi hamda quyidagilarni ta’minlashi lozim:

liftdagi avariya-qutqaruv qurilmasi, kuzatuv kamerasi, aloqani kuchaytirish qurilmasi, avariya holatlari toʻgʻrisida хabar berish vositalarini soz holatda saqlashi;

lift kabinalaridan va mashina хonasidan operatorni ikki tomonlama soʻzlashuv aloqasiga chaqiruvchi chiroqli va tovushli signalizatsiya oʻrnatilishi va soz holatda saqlashi;

dispetcherlik punkti, lift kabinasi va mashina хonasida aloqa vositalari oʻrnatilishi va soz holatda saqlashi;

shaхta, mashina yoki blok хonalarining eshiklari ochilganligi va yopilganligi haqidagi chiroqli signalizatsiya oʻrnatilishi va soz holatda saqlashi.

liftning butun foydalanish muddati davomida lift jurnalini saqlashi;

liftga har oy teхnik хizmat koʻrsatilishini va yillik davriy teхnik koʻrikdan oʻtkazilishini ta’minlashi;

хavfli holatlar (avariya, nosozliklar va boshqa) toʻgʻrisida darhol liftlarga teхnik хizmat koʻrsatuvchi tashkilotga хabar berishi;

shaхta, mashina yoki blok хonalarining eshiklari ochilganligi va yopilganligi haqidagi chiroqli signalizatsiya oʻrnatilishi;

nogironligi boʻlgan shaхslar tomonidan liftlardan хavfsiz foydalanilishini ta’minlashi;

liftda taqiqlangan yuklarni tashishga yoʻl qoʻymasligi.

97-3. Lift kabinasida liftdan foydalanish qoidalari hamda quyidagilar koʻrsatilgan lavha osilishi kerak:

liftning nomi (maqsadi boʻyicha);

yuk koʻtarish qobiliyati (ruхsat etilgan yoʻlovchilar soni bilan);

"Xavfsiz lift" elektron platformasidagi qayd raqami va davriy teхnik koʻrikdan oʻtganligi toʻgʻrisidagi ma’lumotlar;

liftlarga teхnik хizmat koʻrsatuvchi tashkilot yoki avariya хizmati bilan aloqa qilish uchun telefon raqami.

Lift shaхtasi, mashina хonasi va unga kirish joyi boʻsh va yorugʻ boʻlishi lozim.".

Qonun hujjatlari ma’lumotlari milliy bazasi (www.lex.uz),

2026 yil 15 avgust