2023 йил июнь ойи учун бош бухгалтер режаси

1 июня 2023 г.

2023 йил июнь ойида қандай ҳисоботлар тақдим этилиши ва қандай солиқлар тўланиши кераклигини бизнинг режамиз ва унга «Норма» экспертларининг ҳамда Молия ва иқтисодиёт вазирлиги, Давлат солиқ қўмитаси мутахассисларининг тавсияларида берилган йўриқномалардан билиб олишингиз мумкин.

Эътибор беринг

Муҳим материалларни ўтказиб юбормаслик учун бизнинг ТГ-каналимизга обуна бўлинг.

Биз унда янги ёки ўзгартиришлар киритилган материалларга анонсларни бериб борамиз.

Режамизга қуйидаги саналар киритилди:

5 июнь:

2023 йил май ойида банклар томонидан Ўзбекистон Республикасининг норезидентларига тўланган даромадлар (дивидендлар ва фоизлар тўловидан ташқари) бўйича фойда солиғини бюджетга ўтказишнинг сўнгги куни ;

7 июнь:

2023 йил май ойида натура шаклида тўланган даромадлардан ЖШДСни тўлашнинг сўнгги куни . Даромадлар натура шаклида тўланганда ҳисобланган солиқ суммаси даромад тўланган ой тугаганидан кейин 5 кун ичида тўланади.

Қуйидаги материални тавсия қиламиз:

– Кимлар ЖШДС тўлаши лозим.

9 июнь:

2023 йил июнь ойи учун чакана савдо ва умумий овқатланиш корхоналари томонидан алкоголь маҳсулотларини реализация қилиш ҳуқуқи учун йиғимни тўлашнинг сўнгги куни

10 июнь (10 июнь шанба кунига тўғри келганлиги сабабли 12 июнь):

2023 йил май ойи учун акциз солиғи бўйича солиқ ҳисоботини тақдим этиш ва тўловни тўлашнинг сўнгги куни

Мавзуга доир материаллар:

– Кимлар акциз солиғини тўлайдилар;
– Акциз солиғи бўйича ҳисобот қандай тақдим этилади ва солиқ қандай тартибда тўланади;
– Акциз солиғи қандай ҳисобланади.

2023 йил май ойи учун Қимматли қоғозларнинг марказий депозитарийси томонидан ўзи ва инвестиция воситачилари томонидан рўйхатга олинган акцияларга доир битимлар тўғрисидаги ахборот тақдим этишнинг сўнгги куни ;

2023 йил июнь ойи учун мол-мулк солиғи бўйича бўнак тўловларини айланмадан олинадиган солиқни тўловчилар ҳисобланмайдиган солиқ тўловчилар томонидан йиллик солиқ суммасининг 1/12 қисми миқдорида тўлашнинг сўнгги куни ;

Қуйидагиларни тавсия қиламиз:

– Кимлар юридик шахсларнинг мол-мулкига солинадиган солиқни тўлайди;
– Юридик шахсларнинг мол-мулкига солинадиган солиқ қандай ҳисобланади;
– Юридик шахсларнинг мол-мулкига солинадиган солиқ энг кам қийматни ҳисобга олган ҳолда қандай ҳисобланади;
– Мол-мулк солиғи бўйича ҳисобот қандай тақдим этилади ва солиқ қандай тартибда тўланади.

айланмадан олинадиган солиқни тўламайдиган солиқ тўловчилар томонидан қишлоқ хўжалиги учун мўлжалланмаган ерлар учун 2023 йил июнь ойи учун ер солиғини йиллик солиқ суммасининг 1/12 қисми миқдорида тўлашнинг сўнгги куни

Қуйидагиларни тавсия қиламиз:

– Кимлар юридик шахслардан олинадиган ер солиғини тўлайди;
– Юридик шахслардан олинадиган ер солиғи қандай ҳисобланади;
– Ер солиғи бўйича ҳисобот қандай тақдим этилади ва солиқ қандай тартибда тўланади.

* Кунлар билан ҳисобланадиган муддат, агар бу муддат календарь кунлар билан белгиланмаган бўлса, иш кунлари билан ҳисобланади. Бунда қонунчиликка мувофиқ дам олиш ва (ёки) иш куни бўлмаган байрам куни деб эътироф этилмайдиган кун иш куни деб ҳисобланади.

Агар муддатнинг охирги куни қонунчиликка мувофиқ дам олиш ва (ёки) иш куни бўлмаган кун деб эътироф этиладиган кунга тўғри келса, дам олиш кунидан ва (ёки) иш куни бўлмаган кундан кейинги иш куни муддатнинг тамом бўлиш куни деб ҳисобланади .

14 июнь:

2023 йил май ойи учун ШЖБПҲ реестрларини тақдим этиш ва бадалларни тўлашнинг сўнгги куни ;

Қуйидаги материални тавсия қиламиз:

– ЖШДС бўйича ҳисобот қандай тақдим этилади ва солиқ қандай тартибда тўланади.

15 июнь:

2023 йил май ойи учун ЖШДСва ижтимоий солиқ бўйича солиқ ҳисоботини тақдим этиш ва солиқларни тўлашнинг сўнгги куни. ЖШДС жисмоний шахсга даромадларни тўлаш билан бир вақтда, бироқ солиқ ҳисоботи тақдим этиладиган муддатдан кечиктирмай тўланади ;

Қуйидагиларни тавсия қиламиз:

– ЖШДС кимлар томонидан тўланади;
– ЖШДС солинадиган объект ва унинг солиқ базаси қандай аниқланади;
– ЖШДСни ҳисоблаб чиқариш учун даромад олинган сана қандай аниқланади.

2023 йил июнь ойи учун солиқ тўловчилар томонидан қатъий миқдорда белгиланган ЖШДСни тўлашнинг сўнгги куни. Солиқ тўловчилар қатъий белгиланган миқдорда ЖШДС тўлашни улар тадбиркорлик субъекти сифатида давлат рўйхатидан ўтказилган ёки якка тартибдаги тадбиркор ёхуд оилавий тадбиркорлик субъекти билан меҳнат шартномаси тузилган ойдан кейинги ойдан эътиборан амалга оширади .
2023 йил май ойи учун айланмадан олинадиган солиқ ҳисоб-китобини тақдим этиш ва солиқни тўлашнинг сўнгги куни (ҳисоботни тақдим этишдан озод қилинган, айланмадан қатъий миқдорда белгиланган солиқни тўловчилар бундан мустасно) .

Қуйидагиларни тавсия қиламиз:

– Кимлар айланмадан олинадиган солиқни тўлайдилар;
– Айланмадан олинадиган солиқ суммаси қандай ҳисобланади;
– Айланмадан олинадиган солиқ қандай муддатларда ва қандай тартибда тўланади.

16 июнь:

айланмадан олинадиган солиқни тўловчилар томонидан 2023 йил июль ойидан бошлаб солиқ ҳисобида турган жойи бўйича ДСҚда белгиланган шакл бўйича қатъий миқдорда белгиланган солиқни тўлашга ўтилиши тўғрисидаги хабарномани тақдим этишнинг сўнгги куни *. Бунда солиқ тўловчилар кейинги солиқ даври бошланишидан 10 кун олдин рўйхатдан ўтган солиқ органларига тегишли хабарномани тақдим этиб, кейинги солиқ давридан бошлаб қатъий миқдорда белгиланган солиқни тўлашни рад қилишга ва СКнинг 467-моддаси 1-қисмида кўрсатилган ставкалар бўйича айланмадан олинадиган солиқни тўлашга ўтишга ҳақли .

Агар Ўзбекистонда Қурбон Ҳайити Президентнинг қарорига биноан 2023 йил 28 июнда нишонланадиган бўлса, хабарномани тақдим этиш санаси 2023 йил 13 июнга кўчирилиши мумкин.

20 июнь:

2023 йил май ойи учун ҚҚС бўйича ҳисоботни тақдим этиш ва солиқни тўлашнинг сўнгги куни .

Солиқ тўловчилар ва солиқ тўловчи бўладиганлар учун фойдали маълумотлар:

– Товарлар ва хизматлар реализация қилинганда ҚҚС қандай ҳисобланади;
– ҚҚС тўлашга қандай ўтилади;
– ҚҚС бўйича ҳисобот қандай тўлдирилади.

сув ресурсларидан фойдаланганлик учун солиқ бўйича бўнак тўловларини :

– 2023 йил июнь ойи учун солиқ даврида солиқ суммаси БҲМнинг 200 бараваридан кўпроқни ташкил этадиган юридик шахслар – айланмадан олинадиган солиқни тўламайдиган солиқ тўловчилар томонидан йиллик солиқ суммасининг 1/12 қисми миқдорида тўлашнинг сўнгги куни;

– 2023 йилнинг II чораги учун солиқ даврида солиқ суммаси БҲМнинг 200 бараваридан камроқни ташкил этадиган юридик шахслар – айланмадан олинадиган солиқни тўламайдиган солиқ тўловчилар томонидан, шунингдек айланмадан олинадиган солиқни тўловчилар ва якка тартибдаги тадбиркорлар томонидан йиллик солиқ суммасининг 1/4 қисми миқдорида тўлашнинг сўнгги куни;

Мавзуга доир тавсия:

– Сув ресурсларидан фойдаланганлик учун солиқ бўйича бўнак тўловлари қандай тўланади.

2023 йилнинг II чораги учун айланмадан олинадиган солиқни тўловчилар томонидан қишлоқ хўжалиги учун мўлжалланмаган ерлар учун ер солиғини йиллик солиқ суммасининг 1/4 қисми миқдорида тўлашнинг сўнгги куни

Қуйидаги йўриқномани тавсия қиламиз:

– Кимлар юридик шахслардан олинадиган ер солиғини тўлайдилар;
– Юридик шахслардан олинадиган ер солиғи қандай ҳисобланади;
– Ер солиғи бўйича ҳисобот қандай тақдим этилади ва солиқ қандай тартибда тўланади.

2023 йилнинг II чораги учун айланмадан олинадиган солиқни тўловчилар томонидан мол-мулк солиғи бўйича бўнак тўловларини йиллик солиқ суммасининг 1/4 қисми миқдорида тўлашнинг сўнгги куни

Қуйидагиларни тавсия қиламиз:

2023 йил май ойи учун солиқ агентлари томонидан дивидендлар ва фоизлардан олинадиган солиқ суммаси бўйича ҳисобот тақдим этишнинг сўнгги куни. Солиқ суммаси дивидендлар ва фоизлар тўланадиган кундан кечиктирмай бюджетга тўланади ;

Қуйидаги йўриқномани тавсия қиламиз:

– Норезидентнинг даромадларидан тўлов манбаида фойда солиғи қандай тўланади.

2023 йил май ойи учун чет эллик шахслардан олинган товарлар (хизматлар) бўйича ҚҚС ҳисоб-китобини тақдим этишнинг сўнгги куни *;

Мавзуга доир қуйидаги материалларни ўқинг:

– Қандай ҳолатларда чет эл юридик шахслари томонидан ҚҚС тўланади;
– Чет эллик шахслардан товарлар ва хизматлар олинганда солиқ агенти томонидан ҚҚС қандай ҳисобланади.

2023 йил май ойи учун солиқ агентлари** томонидан дивидендлар ва фоизлардан олинадиган солиқ суммаси бўйича ҳисобот тақдим этишнинг сўнгги куни (ҳисоботни тақдим этишдан озод қилинган, айланмадан қатъий миқдорда белгиланган солиқни тўловчилар бундан мустасно). Солиқ суммаси дивидендлар ва фоизлар тўланадиган кундан кечиктирмай бюджетга тўланади ;
2023 йил май ойи учун ер қаъридан фойдаланганлик учун солиқ бўйича солиқ ҳисоботини тақдим этиш ва солиқни тўлашнинг сўнгги куни ;

Солиқ тўловчилар учун тавсия:

– Кимлар ва қандай тартибда ер қаъридан фойдаланганлик учун солиқни тўлайди.

** ҚҚС тўловчилар бўлмаган солиқ агентлари ўзи солиқ ҳисобида турган жойдаги солиқ органларига солиқ тўлаш амалга оширилган ўтган солиқ давридан кейинги ойнинг 20-санасидан кечиктирмай тақдим этади .

23 июнь:

2023 йил июнь ойи учун жами даромади жорий солиқ давридан олдинги солиқ даври учун киритилган тузатишлар ҳисобга олинган ҳолда 5 млрд сўмдан ошадиган солиқ тўловчилар томонидан фойда солиғи бўйича ойлик бўнак тўловларини тўлашнинг сўнгги куни *.

Мавзуга доир тавсия:

– Фойда солиғи бўйича ҳисобот қандай тақдим этилади ва солиқ қандай тартибда тўланади.

* Солиқ кодексининг 340-моддаси 3-6-қисмларига мувофиқ ҳисоблаб чиқарилган ҳар ойлик бўнак тўловининг суммаси манфий ёки нолга тенг бўлса, кўрсатилган тўловлар тегишли чоракда амалга оширилмайди .

Солиқ тўловчилар, шу жумладан янгидан ташкил этилган, жами даромади жорий ҳисобот даври мобайнида 5 млрд сўмдан ошган солиқ тўловчилар ҳар ойлик бўнак тўловларини бундай ошиб кетиш содир бўлган тўлиқ чорак ўтганидан кейин тўлайди .

25 июнь (25 июнь якшанба кунига тўғри келганлиги сабабли 26 июнь):

2023 йил май ойи учун меҳнатда шикастланиш ёки касб касалликлари оқибатида тайинланган пенсиялар тўлови бўйича харажатларни қоплаш учун маблағларни тўлашнинг сўнгги куни .

Татьяна ЛИМАРЕВА,

«Норма» компанияси эксперти.