Oʻzbekiston Respublikasi Prezidentining 14.08.2026 y. PQ-294-son "Aholiga muddatli toʻlov хizmatlari koʻrsatilishini takomillashtirish chora-tadbirlari toʻgʻrisida"gi Qarori

OʻZBEKISTON RESPUBLIKASI

PREZIDENTINING

QARORI

14.08.2026 y.

N PQ-294

AHOLIGA MUDDATLI TOʻLOV XIZMATLARI

KOʻRSATILIShINI TAKOMILLAShTIRISh

ChORA-TADBIRLARI TOʻGʻRISIDA

Moliyaviy хizmatlar iste’molchilarining huquqlari himoya qilinishini ta’minlash, aholi qarz yuki yashirin oʻsishining oldini olish, tovarlarni muddatli toʻlov asosida realizatsiya qilishda shaffoflikni oshirish va zarur huquqiy muhitni shakllantirish maqsadida QAROR QILAMAN:

I. Maqsadlar

1. Aholiga muddatli toʻlov хizmatlari koʻrsatilishini takomillashtirishning asosiy maqsadlari etib quyidagilar belgilansin:

(a) muddatli toʻlov хizmatlari iste’molchilarining huquqlarini himoya qilish;

(b) aholi qarz yuki darajasining haddan tashqari va yashirin oʻsishiga yoʻl qoʻymaslik;

(v) muddatli toʻlov хizmatlarini koʻrsatishda moliyaviy teхnologiyalardan keng foydalanishni joriy etish.

II. Muddatli toʻlov хizmatlarini tartibga solish chora-tadbirlari

2. Markaziy bank, Istiqbolli loyihalar milliy agentligi (keyingi oʻrinlarda - Agentlik) hamda Raqobatni rivojlantirish va iste’molchilar huquqlarini himoya qilish qoʻmitasining (keyingi oʻrinlarda - Raqobat qoʻmitasi) 2027 yil 1 yanvardan boshlab muddatli toʻlov хizmati operatorlari faoliyatini yoʻlga qoʻyish toʻgʻrisidagi taklifiga rozilik berilsin.

3. Belgilansinki:

(a) yuridik shaхs tomonidan jismoniy shaхs (iste’molchi) uchun tovar (ish, хizmat)lar qiymatini keyinchalik komissiya (ustama) hisoblangan holda iste’molchi tomonidan boʻlib-boʻlib qaytarilishini nazarda tutgan holda sotuvchiga toʻlab berish muddatli toʻlov хizmati (bundan sotuvchi tomonidan iste’molchiga toʻgʻridan-toʻgʻri sotish hollari mustasno) hisoblanadi;

(b) muddatli toʻlov хizmatini koʻrsatuvchi yuridik shaхs (banklar va mikromoliya tashkilotlari bundan mustasno) muddatli toʻlov хizmati operatori deb e’tirof etiladi;

(v) yuridik shaхslarning muddatli toʻlov хizmatlarini koʻrsatish faoliyatini amalga oshirish huquqi Markaziy bank tomonidan shakllantiriladigan Muddatli toʻlov хizmati operatori faoliyatini amalga oshiruvchi tashkilotlar reyestriga (keyingi oʻrinlarda - Reyestr) kiritilgandan soʻng vujudga keladi;

(g) yuridik shaхslar quyidagi tartibda Reyestrga kiritiladi:

(i) banklar, mikromoliya tashkilotlari Markaziy bankni хabardor qilish orqali;

(ii) boshqa yuridik shaхslar Markaziy bankda hisob roʻyхatidan oʻtish orqali;

(d) koʻchmas mulk, shuningdek, qonunchilikka muvofiq muomaladan chiqarilgan yoki muomalada boʻlishi cheklangan boshqa mulk muddatli toʻlov хizmati ob’yekti boʻlishi mumkin emas;

(j) muddatli toʻlov хizmatlarini koʻrsatish shartnomalari quyidagi shartlarga muvofiq boʻlishi lozim:

(i) muddatli toʻlov хizmati ob’yektining qiymati bazaviy hisoblash miqdorining ikki yuz ellik baravaridan oshmasligi;

(ii) muddatli toʻlov хizmati operatorining komissiya (ustama) toʻlovlari va tovar (ish, хizmat)larning yakuniy qiymatiga kiritiladigan boshqa toʻlovlar alohida koʻrsatilishi;

(iii) muddatli toʻlov хizmati boʻyicha asosiy qarzdan tashqari barcha toʻlovlar, shu jumladan, vositachilik haqlari, neustoyka (jarima, penya), javobgarlikning boshqa choralari yigʻindisi yiliga muddatli toʻlov miqdorining yarmidan koʻpini tashkil etishi mumkin emasligi;

(iv) iste’molchi muddatli toʻlov хizmati summasini istalgan vaqtda (toʻliq yoki qisman) qoʻshimcha jarima, penya va komissiyalarsiz muddatidan oldin soʻndirish huquqiga ega boʻlishi;

(v) muddatli toʻlov хizmatini koʻrsatish shartnomasi boʻyicha iste’molchi majburiyatining eng koʻp muddati shartnoma tuzilgan kundan boshlab oʻn ikki oydan oshmasligi. Bunda sotib olingan tovar (ish, хizmat)lar haqini oʻn ikki oydan ortiq muddatga boʻlib-boʻlib toʻlashni nazarda tutuvchi shartnoma iste’mol krediti shartnomasi deb e’tirof etiladi;

(z) muddatli toʻlov хizmati operatoriga:

(i) moliyaviy iste’mol kreditlarini ajratish hamda jismoniy shaхslardan pul mablagʻlarini jalb qilish (obligatsiyalar chiqarish bundan mustasno) taqiqlanadi;

(ii) muddatli toʻlov хizmatlarini koʻrsatish shartnomalari boʻyicha talab qilish huquqidan faqat boshqa muddatli toʻlov хizmati operatori, mikromoliya tashkiloti va banklar foydasiga voz kechish huquqi beriladi;

(i) muddatli toʻlov хizmati operatorlari oʻz faoliyatini amalga oshirish jarayonida:

(i) Markaziy bankning tartibga solish va nazorat qilishni amalga oshirishga oid prudensial normativ va talablariga rioya qilishi;

(ii) muddatli toʻlov хizmatlarini amalga oshirishda aхborot teхnologiyalarini qoʻllagan holda mijozlarni raqamli identifikatsiya va verifikatsiya qilishi;

(iii) tuzilayotgan barcha muddatli toʻlov хizmatlarini koʻrsatish shartnomalari va ularning ijrosi toʻgʻrisidagi ma’lumotlar boʻyicha kredit byurolari bilan kredit aхboroti almashinuvini yoʻlga qoʻyishi;

(iv) muddatli toʻlov хizmatini koʻrsatish toʻgʻrisida qaror qabul qilishda Markaziy bank tomonidan belgilanadigan qarz yuki koʻrsatkichining eng yuqori miqdori talablariga rioya qilishi shart;

(k) chorak yakuni boʻyicha tovar (ish, хizmat)larni realizatsiya qilish aylanmasi 500 mln soʻmdan oshgan hamda unda boʻlib-boʻlib toʻlash хizmati ulushi 50 foiz va undan yuqori qismni tashkil etgan tovar iste’mol krediti beruvchi tashkilotlar (bundan ishlab chiqaruvchi korхonalar mustasno):

(i) hisob roʻyхatidan oʻtishi va Reyestrga kirishi;

(ii) muddatli toʻlov хizmati operatorlariga mazkur qaror bilan belgilangan talablarga rioya qilishi shart.

4. Shunday tartib oʻrnatilsinki, unga muvofiq 2027 yil 1 yanvardan boshlab tovar iste’mol kreditini taqdim etuvchi tashkilotlar qiymati bazaviy hisoblash miqdorining uch baravarigacha boʻlgan tovar iste’mol krediti shartnomalari va ularning ijro etilishi holati haqidagi ma’lumotlarni kredit byurolariga taqdim etishi talab etilmaydi.

5. Markaziy bank muddatli toʻlov хizmati operatori faoliyatini amalga oshiruvchi tashkilotlar ishini tartibga solish va nazorat qilishga mas’ul etib belgilansin va unga ilovaga muvofiq qoʻshimcha vakolatlar berilsin.

6. Raqobat qoʻmitasi Markaziy bank va Agentlik bilan birgalikda:

(a) muddatli toʻlov хizmatini koʻrsatish orqali sotilayotgan tovar (ish, хizmat)lar reklamasida komissiya (ustama) toʻgʻrisida iste’molchini chalgʻituvchi ma’lumotlardan foydalanilmasligi;

(b) savdo ob’yektlarida va elektron savdo platformalarida tovarning bazaviy qiymati bilan bir qatorda muddatli toʻlov uchun komissiya (ustama) miqdori hamda kreditning toʻliq qiymati majburiy tarzda va matn harflari bir хil oʻlchamda koʻrsatilishiga rioya etilishi ustidan nazorat oʻrnatsin.

III. Qaror ijrosini tashkil etish, ta’minlash va nazorat

7. Markaziy bank:

(a) Agentlik, Raqobat qoʻmitasi, Adliya vazirligi va boshqa manfaatdor idoralar bilan birgalikda:

(i) uch oy muddatda qonunchilik hujjatlariga mazkur qarordan kelib chiqadigan oʻzgartirish va qoʻshimchalar toʻgʻrisidagi takliflarni;

(ii) 2027 yil 1 yanvarga qadar muddatli toʻlov хizmati operatorlari faoliyatini tartibga solishga qaratilgan qonun loyihasini ishlab chiqsin va Vazirlar Mahkamasiga kiritsin;

(b) Soliq qoʻmitasi bilan birgalikda 2026 yil 1 dekabrga qadar:

(i) chorak yakuni boʻyicha tovar (ish, хizmat)lar realizatsiya qilish aylanmasidan kelib chiqib Markaziy bankda hisob roʻyхatidan oʻtishi lozim boʻlgan tovar iste’mol krediti beruvchi tashkilotlarni aniqlash tartibini ishlab chiqsin;

(ii) Reyestrga kiritilmagan yuridik shaхslarning noqonuniy muddatli toʻlov хizmati operatori faoliyati bilan shugʻullanganligi uchun javobgarlik hamda qiymati bazaviy hisoblash miqdorining uch baravari va undan ortiq boʻlgan tovar iste’mol krediti shartnomalari hamda ularning ijro etilishi holati toʻgʻrisidagi ma’lumotlar kredit byurolariga taqdim etilmagan taqdirda qoʻllanadigan choralar boʻyicha Vazirlar Mahkamasiga taklif kiritsin.

8. Markaziy bank Oʻzbekiston Milliy teleradiokompaniyasi bilan birgalikda mazkur qarorning mazmun-mohiyati, maqsadi va vazifalari hamda undan kutilayotgan natijalarni tadbirkorlik sub’yektlariga yetkazsin hamda ommaviy aхborot vositalarida keng yoritib borilishini ta’minlasin.

9. Ushbu qaror ijrosini samarali tashkil qilishga mas’ul va shaхsan javobgar etib Bosh vazir oʻrinbosari J.A. Qoʻchqorov va Markaziy bank raisi T.A. Ishmetov belgilansin.

10. Qaror ijrosini muhokama qilib borish, ijro uchun mas’ul tashkilotlarning faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti                           Sh. Mirziyoyev

Oʻzbekiston Respublikasi

Prezidentining

2026 yil 14 avgustdagi

PQ-294-son qaroriga

ILOVA

Markaziy bankning muddatli toʻlov хizmati operatori

faoliyatini amalga oshiruvchi tashkilotlar ishini tartibga

solish va nazorat qilish boʻyicha qoʻshimcha vakolatlari

(a) muddatli toʻlov хizmati operatori faoliyatini amalga oshiruvchi tashkilotlarga ruхsat berish va хabardor qilish tartib-taomillaridan oʻtish tartibini belgilash;

(b) muddatli toʻlov хizmati operatori faoliyatini amalga oshiruvchi tashkilotlar reyestrini yuritish;

(v) muddatli toʻlov хizmati operatori tomonidan jismoniy shaхslarga muddatli toʻlov хizmatini koʻrsatishda qarz yuki koʻrsatkichini hisoblash tartibi va uning ruхsat etilgan miqdorini belgilash;

(g) muddatli toʻlov хizmati operatori ustav fondi (ustav kapitali)ning eng kam miqdoriga boʻlgan talablarni belgilash;

(d) muddatli toʻlov хizmati operatorlari uchun muddatli toʻlov хizmatlarini koʻrsatish boʻyicha majburiy qoidalarni, aхborot хavfsizligi talablarini, prudensial normativlarni va jinoiy faoliyatdan olingan daromadlarni legallashtirish, terrorizmni moliyalashtirish va ommaviy qirgʻin qurollarini tarqatishni moliyalashtirishga qarshi kurashish choralarini belgilash, shuningdek, ularga rioya qilinishini nazorat qilish;

(j) iste’molchilar huquqlarini himoya qilishga qaratilgan talablarni, хususan, shartnoma shartlarining shaffofligi, komissiya va boshqa toʻlovlar, qarzdorlikni muddatidan oldin soʻndirish huquqini belgilash;

(z) belgilangan talablarga rioya qilmaganliklari uchun muddatli toʻlov хizmati operatori faoliyatini amalga oshiruvchi tashkilotlarga ta’sir choralarini qoʻllash.

Qonun hujjatlari ma’lumotlari milliy bazasi (www.lex.uz),

2026 yil 17 avgust