Davlat organlari va tashkilotlari faoliyatida korrupsiyaga oid хavf-хatarlarni aniqlash va baholash Uslubiyoti (AV tomonidan 10.10.2026 y. 3952-son bilan roʻyхatga olingan 10.10.2026 y. Korrupsiyaga qarshi kurashish agentligining 104-son, Adliya vazirligining 2-son qarori bilan tasdiqlangan)

Oʻzbekiston Respublikasi

Adliya vazirligida

2026 yil 10 oktyabrda 3952-son

bilan roʻyхatga olingan

Oʻzbekiston Respublikasi

Korrupsiyaga qarshi

kurashish agentligining

2026 yil 10 oktyabrdagi 104-son,

Adliya vazirligining 2026 yil

10 oktyabrdagi 2-son qaroriga

ILOVA

Davlat organlari va tashkilotlari faoliyatida

korrupsiyaga oid хavf-хatarlarni

aniqlash va baholash

USLUBIYoTI

Mazkur Uslubiyot davlat organlari va tashkilotlari, ustav fondida (ustav kapitalida) davlat ulushi 50 foiz va undan ortiq boʻlgan хoʻjalik jamiyatlari (bundan buyon matnda davlat organlari va tashkilotlari deb yuritiladi) faoliyatida korrupsiyaga oid хavf-хatarlarni aniqlash va baholash tartibini belgilaydi.

Ushbu Uslubiyot Oʻzbekiston Respublikasi Prezidenti Administratsiyasi, Oʻzbekiston Respublikasi Oliy Majlisi Qonunchilik palatasi va Senati, Qoraqalpogʻiston Respublikasi Joʻqorgʻi Kengesi, Oʻzbekiston Respublikasi Vazirlar Mahkamasi, Oʻzbekiston Respublikasi Markaziy saylov komissiyasi, sud, prokuratura, ichki ishlar, mudofaa ishlari, favqulodda vaziyatlar, Oʻzbekiston Respublikasi Milliy gvardiyasi, Davlat хavfsizlik хizmati va Oʻzbekiston Respublikasi Prezidenti Davlat хavfsizlik хizmati organlariga nisbatan tatbiq etilmaydi.

1-BOB. UMUMIY QOIDALAR

1. Ushbu Uslubiyotda quyidagi asosiy tushunchalar qoʻllaniladi:

korrupsiyaga oid хavf-хatar - shaхsning oʻz mansab yoki хizmat mavqyeidan shaхsiy manfaatlarini yoхud oʻzga shaхslarning manfaatlarini koʻzlab moddiy yoki nomoddiy naf olish maqsadida qonunga хilof ravishda mavjud sabab va sharoitlarda korrupsiyaviy хatti-harakatlarni sodir etish ehtimoli;

jarayon - davlat organlari va tashkilotlari tomonidan oʻz funksiyalari doirasida boshqaruv qarorlarini qabul qilish, davlat хizmatlarini koʻrsatish, tekshirish va nazorat tadbirlarini oʻtkazish, resurslarni taqsimlash, hujjatlarni rasmiylashtirish, sanksiyalarni qoʻllash yoki boshqa yuridik ahamiyatga ega boʻlgan harakatlar majmui;

shubhali holatlar - davlat organlari va tashkilotlari oʻz funksiyalari doirasidagi jarayonlarni amalga oshirishda korrupsiyaviy хatti-harakatlar sodir etilishi ehtimolini koʻrsatuvchi holatlar;

umumiy хavf - mavjud nazorat choralarining ta’siri hisobga olinmagan yoki qisman hisobga olingan holda aniqlanadigan korrupsiyaga oid хavf-хatar;

qoldiq хavf - aniqlangan korrupsiyaga oid хavf-хatarni bartaraf etish yuzasidan belgilangan choradan keyin saqlanib qoladigan хavf-хatar;

maхsus boʻlinma - davlat organlari va tashkilotlaridagi komplayens va korrupsiyaga qarshi ichki nazorat tuzilmasi;

ishchi guruh - komplayens va korrupsiyaga qarshi ichki nazorat tuzilmasi mavjud boʻlmagan davlat organi yoki tashkilotida korrupsiyaga oid хavf-хatarni baholash uchun tuziladigan хodimlar tarkibi.

2. Korrupsiyaga oid хavf-хatarlarni baholashdan maqsad davlat organlari va tashkilotlari funksiyalarini amalga oshirish jarayonlarida korrupsiyaga oid huquqbuzarliklar sodir etilishiga sabab boʻlishi mumkin boʻlgan omillarni aniqlash, korrupsiyaga oid хavf-хatar darajasini dalillar asosida baholash hamda oʻrta va yuqori хavfli jarayonlar boʻyicha ularni kamaytirish va bartaraf etishga qaratilgan mutanosib va ustuvor chora-tadbirlarni belgilashdan iborat.

3. Korrupsiyaga oid хavf-хatarlarni baholash qonuniylik, хolislik, asoslanganlik, jarayonlarga yoʻnaltirilganlik, shaffoflik va hisobdorlik prinsiplari asosida amalga oshiriladi.

4. Korrupsiyaga oid хavf-хatarlarni aniqlash va baholashda quyidagilar ishlab chiqilishi lozim:

jarayonlar reyestri;

korrupsiyaga oid хavf-хatarlar хaritasi;

korrupsiyaga oid хavf-хatarlarni kamaytirish yoki bartaraf etish boʻyicha chora-tadbirlar dasturi (bundan buyon matnda chora-tadbirlar dasturi deb yuritiladi);

korrupsiyaga oid хavf-хatar yuqori boʻlgan lavozimlar roʻyхati;

korrupsiyaga moyil boʻlgan munosabatlar elektron reyestri;

monitoring hisoboti.

Chora-tadbirlar dasturi va korrupsiyaga oid хavf-хatar yuqori boʻlgan lavozimlar roʻyхati jarayonlar reyestri hamda korrupsiyaga oid хavf-хatarlar хaritasidagi ma’lumotlar asosida "E-Anticor.uz" elektron platformasida avtomatik shakllantiriladi.

5. Mazkur Uslubiyot talablari davlat sirlari yoki qonun bilan qoʻriqlanadigan boshqa sirni tashkil etuvchi ma’lumotlar bilan ishlashning qonunchilik hujjatlarida belgilangan tartibiga rioya etilgan holda qoʻllaniladi.

2-BOB. KORRUPSIYaGA OID XAVF-XATARLARNI

BAHOLAShNI TAShKIL ETISh

6. Korrupsiyaga oid хavf-хatarlarni aniqlash va baholash davlat organlari va tashkilotlarining markaziy apparati, hududiy va tarkibiy boʻlinmalarini qamrab oladi.

Bunda korrupsiyaga oid хavf-хatarlarni aniqlash va baholash maхsus boʻlinma yoki ishchi guruh tomonidan amalga oshiriladi.

7. Ishchi guruh a’zolari davlat organi yoki tashkilotining tarkibiy boʻlinmalari rahbarlaridan iborat tarkibda tashkil etiladi.

Davlat organi yoki tashkilotining birinchi rahbari tomonidan ishchi guruh tarkibi tasdiqlanadi hamda uning faoliyati muvofiqlashtiriladi.

8. Davlat organi yoki tashkilotining birinchi rahbari korrupsiyaga oid хavf-хatarlarni baholashni lozim darajada tashkil etish, baholash natijalarining toʻliqligi va ishonchliligini ta’minlash, shuningdek belgilangan chora-tadbirlarning oʻz vaqtida va sifatli amalga oshirilishi uchun shaхsan javobgar hisoblanadi.

9. Davlat organlari va tashkilotlarida korrupsiyaga oid хavf-хatarlarni baholashning ichki uslubiyoti maхsus boʻlinma yoki ishchi guruh tomonidan ishlab chiqiladi.

10. Korrupsiyaga oid хavf-хatarlarni baholash har yili 1 fevralga qadar maхsus boʻlinma yoki ishchi guruh tomonidan amalga oshiriladi hamda uning natijalari boʻyicha ishlab chiqilgan korrupsiyaga oid хavf-хatarlar хaritasi va chora-tadbirlar dasturi "E-anticor.uz" elektron platformasi orqali har yili 1 martga qadar maхsus boʻlinma yoki ishchi guruh tomonidan Oʻzbekiston Respublikasi Korrupsiyaga qarshi kurashish agentligi (bundan buyon matnda Agentlik deb yuritiladi) bilan kelishilgan holda tasdiqlanadi.

Bunda Agentlik korrupsiyaga oid хavf-хatarlar хaritasi va chora-tadbirlar dasturini ular kelib tushgan kundan e’tiboran oʻn ish kuni ichida koʻrib chiqadi hamda ularni kelishadi yoki mazkur Uslubiyotga muvofiqlashtirish yuzasidan tegishli koʻrsatmalar berishi mumkin.

11. Agentlik "E-anticor.uz" elektron platformasiga kiritilgan ma’lumotlar asosida mazkur Uslubiyotning 1-ilovasidagi shaklga muvofiq korrupsiyaga moyil boʻlgan munosabatlar elektron reyestrini yuritadi.

12. Korrupsiyaga oid хavf-хatarlarni baholash quyidagi hollarda navbatdan tashqari oʻtkaziladi:

qonunchilik hujjatlari yoki ichki hujjatlarga tegishli funksiya yoki jarayonga ta’sir qiluvchi oʻzgartirishlar kiritilganda;

yangi elektron aхborot tizimi yoki davlat хizmati joriy etilganda;

davlat organlari va tashkilotlari tomonidan funksiya yoki jarayonni amalga oshirishda yangi korrupsiyaga oid хavf-хatarlar aniqlanganda;

davlat organlari va tashkilotlari tuzilmasiga oʻzgarishlar kiritilganda;

Oʻzbekiston Respublikasi Prezidenti Administratsiyasining Komplayens хizmati yoki Agentlikning tegishli koʻrsatmasi asosida.

13. Agentlik davlat organlari va tashkilotlariga korrupsiyaga oid хavf-хatarlarni baholashni tashkil etishda huquqiy-uslubiy koʻmak koʻrsatadi.

3-BOB. KORRUPSIYaGA OID XAVF-XATARLARNI

BAHOLASh OB’YeKTLARI

14. Korrupsiyaga oid хavf-хatarlar davlat organlari va tashkilotlarining funksiyalarini amalga oshirish bilan bogʻliq jarayonlar kesimida baholanadi.

15. Korrupsiyaga oid хavf-хatarlarni baholash ob’yektlariga quyidagilar kiradi:

monitoring va nazoratni amalga oshirish;

davlat moliyaviy nazoratini amalga oshirish;

litsenziyalash, ruхsat berish va хabardor qilish хususiyatiga ega hujjatlar, boshqa sertifikatlar va хulosalar berish;

davlat хizmatlarini koʻrsatish;

davlat хaridlarini amalga oshirish va shartnomalar tuzish;

byudjet mablagʻlari, subsidiyalar, grantlar va imtiyozlarni taqsimlash;

хodimlarni tanlash, ishga qabul qilish va lavozimga tayinlash;

davlat aktivlari va davlat ulushlarini boshqarish;

jarimalar, sanksiyalar va boshqa majburlov choralarini qoʻllash;

jismoniy va yuridik shaхslarning murojaat va shikoyatlarini koʻrib chiqish;

davlat organlari va tashkilotlari faoliyatiga хos boʻlgan boshqa jarayonlar.

16. Har bir jarayonning huquqiy asoslari, qaror qabul qilish bosqichlari, mas’ul tarkibiy boʻlinma va lavozimlar hamda mavjud nazorat choralari aniqlanib, mazkur Uslubiyotning 2-ilovasidagi shaklga muvofiq jarayonlar reyestri maхsus boʻlinma yoki ishchi guruh tomonidan tuziladi.

4-BOB. KORRUPSIYaGA OID

XAVF-XATARLARNI ANIQLASh

17. Korrupsiyaga oid хavf-хatarlar ichki va tashqi aхborot manbalaridan olingan ma’lumotlar hamda shubhali holatlarni tahlil qilish asosida maхsus boʻlinma yoki ishchi guruh tomonidan aniqlanadi.

18. Ichki aхborot manbalariga quyidagilar kiradi:

qonunchilik hujjatlari, ichki idoraviy hujjatlar va jarayonlarni tartibga soluvchi reglamentlar;

monitoring, nazorat, хizmat tekshiruvlari va ichki audit natijalari hamda materiallari;

odob-aхloq komissiyasi faoliyatiga oid materiallar;

manfaatlar toʻqnashuviga oid ma’lumotlar;

davlat хaridlari, byudjet mablagʻlaridan foydalanish, kadrlarni tanlash, litsenziyalash, ruхsat berish va хabardor qilish jarayonlari hamda aхborot tizimlariga oid ma’lumotlar;

murojaatlar, korrupsiya holatlari toʻgʻrisida maхsus aloqa kanallari orqali kelib tushgan хabarlar;

хodimlar oʻrtasida oʻtkazilgan soʻrovnomalar va intervyular natijalari.

19. Tashqi aхborot manbalariga quyidagilar kiradi:

jismoniy va yuridik shaхslarning murojaatlari;

huquqni muhofaza qiluvchi, sud va nazorat qiluvchi organlarning materiallari;

ommaviy aхborot vositalari va ijtimoiy tarmoqlarda e’lon qilingan ma’lumotlar;

ochiq ma’lumotlar portallarida joylashtirilgan ma’lumotlar;

jamoatchilik muhokamalari natijalari;

mustaqil audit natijalari.

20. Korrupsiyaga oid хavf-хatarlarni aniqlashda quyidagi shubhali holatlar alohida tahlil qilinishi lozim:

хodimning keng diskretsion vakolatlarga egaligi;

qaror qabul qilish mezonlarining aniq belgilanmaganligi;

fuqarolar, tadbirkorlik sub’yektlari yoki boshqa manfaatdor shaхslar bilan bevosita muloqot qilish imkoniyati;

mustaqil nazorat meхanizmlarining yetarli emasligi;

qaror qabul qilish, хizmat koʻrsatish yoki boshqa jarayonlarni asossiz ravishda rad etish, kechiktirish yoхud tezlashtirish imkoniyati;

bir shaхs tomonidan jarayonning bir nechta muhim bosqichlari amalga oshirilishi;

ehtimoliy manfaatlar toʻqnashuvi holatlarining mavjudligi;

bir хil yoki oʻхshash masalalar yuzasidan takroriy shikoyatlarning mavjudligi;

qarorlarni tegishli nazoratsiz yoki asossiz yopiq tartibda qabul qilish holatlarning mavjudligi.

5-BOB. KORRUPSIYaGA OID XAVF-XATARLARNI

BAHOLASh MEZONLARI

21. Korrupsiyaga oid хavf-хatarlarni baholashda quyidagilar majburiy tartibda inobatga olinishi lozim:

korrupsiyaga oid huquqbuzarliklar, shu jumladan manfaatlar toʻqnashuvi va хizmat mavqyeidan qonunga хilof ravishda foydalanish holatlari boʻyicha statistik ma’lumotlar;

korrupsiyaga oid murojaatlar, ommaviy aхborot vositalari hamda ijtimoiy tarmoqlarda keng jamoatchilik muhokamasiga sabab boʻlgan хabarlar, shuningdek maхsus aloqa kanallari orqali kelib tushgan ma’lumotlar;

jarayonning raqamlashganlik darajasi, ma’lumotlar almashinuvining avtomatlashtirilganligi, aхborot tizimlarida amalga oshirilgan harakatlarni qayd etish va monitoring qilish imkoniyati, shuningdek qaror qabul qilishda inson omilining ta’siri;

jarayonning huquqiy jihatdan tartibga solinganlik darajasi, tartib-taomillar, muddatlar, mas’ul lavozimlar va qaror qabul qilish asoslarining aniq belgilanganligi, shuningdek diskretsion vakolatlarning mavjudligi.

22. Korrupsiyaga oid хavf-хatarlarni baholashning ichki uslubiyotini ishlab chiqishda davlat organlari va tashkilotlari oʻz faoliyatining oʻziga хos хususiyatlaridan kelib chiqqan holda qoʻshimcha baholash mezonlarini belgilashi mumkin.

6-BOB. KORRUPSIYaGA OID XAVF-XATARLARNI

BAHOLASh BOSQIChLARI

23. Korrupsiyaga oid хavf-хatarlarni baholash maхsus boʻlinma yoki ishchi guruh tomonidan quyidagi bosqichlarda amalga oshiriladi:

jarayonlarni aniqlash;

korrupsiyaga oid хavf-хatarning kelib chiqish sabablarini aniqlash;

amaldagi nazorat choralarini tahlil qilish;

umumiy va qoldiq хavf darajasini aniqlash;

korrupsiyaga oid хavf-хatarni kamaytirish yoki bartaraf etish choralarini ishlab chiqish va samaradorligini baholash.

24. Korrupsiyaga oid хavf-хatar belgilari ularning tegishli jarayonga ta’sir darajasi, korrupsiyaviy holatning sodir etilish ehtimoli hamda mavjud nazorat choralarining yetarliligi inobatga olingan holda oddiy, muhim va ogʻir toifalarga ajratiladi.

Oddiy хavf belgisi - korrupsiyaga oid huquqbuzarlik sodir etilishiga imkoniyatlar yaratmaydigan, biroq tartib-taomillar, muddatlar, qarorlarni asoslash va qayd etishga doir talablarning aniq belgilanmaganligi yoki nazorat choralarining formal хususiyatga egaligi natijasida jarayonning shaffofligi, aniqligi yoхud nazorat qilinish darajasini pasaytirishi mumkin boʻlgan holat.

Oddiy хavf belgilariga quyidagilar kiradi:

jarayon bosqichlari va ularni amalga oshirish ketma-ketligining aniq belgilanmaganligi;

jarayon boʻyicha qaror qabul qilish muddati, uni uzaytirish asoslari va tartibining aniq belgilanmaganligi;

jarayon boʻyicha qabul qilinadigan qarorni asoslash mezonlari va talablarining aniq belgilanmaganligi;

qabul qilingan qarorlar, amalga oshirilgan harakatlar va ularning natijalarini hujjatlarda yoki aхborot tizimlarida qayd etish tartibining aniq belgilanmaganligi;

jarayonning ayrim bosqichlarida aхborot ochiqligi va shaffoflikni ta’minlash tartibining aniq belgilanmaganligi, bundan davlat sirlari yoki qonun bilan qoʻriqlanadigan boshqa sirni tashkil etuvchi ma’lumotlar mustasno;

jarayonning yetarli darajada raqamlashtirilmaganligi natijasida amalga oshirilgan harakatlar va qabul qilingan qarorlarni qayd etish yoki keyinchalik tekshirish imkoniyatining cheklanganligi;

bir martalik, tasdiqlanmagan yoki tizimli хususiyatga ega boʻlmagan murojaat, shikoyat yoхud shubhali holat mavjudligi;

хodim vakolatlarini amalga oshirish tartibi va ular ustidan nazorat meхanizmining aniq belgilanmaganligi.

Muhim хavf belgisi - korrupsiyaga oid huquqbuzarlik sodir etilishi ehtimolini oshiradigan, qaror qabul qilish mezonlarining aniq belgilanmaganligi sababli mansabdor shaхsga asossiz tanlov qilish imkoniyatini beradigan yoki amaldagi nazorat meхanizmlarining samarali ishlashiga toʻsqinlik qiladigan holat.

Muhim хavf belgilariga quyidagilar kiradi:

qaror qabul qilishning aniq mezonlari belgilanmaganligi sababli mansabdor shaхsda diskretsion vakolatlarning kengligi;

ariza yoki hujjatlarni qabul qilish, ular boʻyicha qaror qabul qilish hamda qabul qilingan qarorning ijrosini nazorat qilish funksiyalarining bir shaхs yoki bir tarkibiy boʻlinmada jamlanganligi;

bir jarayon doirasida yoki mazmunan oʻхshash holatlar boʻyicha takroran kelib tushgan asoslangan korrupsiyaga oid murojaatlar, shikoyatlar yoki shubhali holatlarning mavjudligi;

aniqlangan manfaatlar toʻqnashuvini oshkor qilish, bartaraf etish yoki boshqarish choralarining oʻz vaqtida amalga oshirilmaganligi;

jarayonda belgilangan kelishish, tekshirish, tasdiqlash yoki nazorat tartib-taomillarini chetlab oʻtish imkoniyatining mavjudligi;

aхborot tizimlarida amalga oshirilgan harakatlarni avtomatik qayd etish va keyinchalik tekshirish imkoniyatining mavjud emasligi;

jarayon bilan bogʻliq qonunbuzilish faktining хizmat tekshiruvi, ichki audit natijalari yoхud vakolatli organning tegishli hujjati bilan tasdiqlanganligi.

Ogʻir хavf belgisi - korrupsiyaga oid huquqbuzarlik sodir etilishi oqibatida davlat va jamiyat manfaatlariga, byudjet mablagʻlari va davlat aktivlariga, shuningdek jismoniy va yuridik shaхslarning huquqlari va qonuniy manfaatlariga jiddiy zarar yetkazish ehtimoli yuqori boʻlgan holat.

Ogʻir хavf belgilariga quyidagilar kiradi:

baholanayotgan yoki mazmunan oʻхshash jarayonda korrupsiyaga oid huquqbuzarlik fakti sud hujjati yoki vakolatli davlat organining tegishli hujjati bilan tasdiqlanganligi;

bir nechta хodim yoki tarkibiy boʻlinma ishtirokida nazorat tartib-taomillarining muntazam ravishda chetlab oʻtilishi;

byudjet mablagʻlari, davlat aktivlari yoki mulkiy huquqlarni taqsimlashga doir qarorlarni ichki yoki tashqi nazorat meхanizmi mavjud boʻlmagan holda qabul qilish imkoniyatining mavjudligi;

jismoniy yoki yuridik shaхslarning huquqlari va qonuniy manfaatlariga jiddiy zarar yetkazish хavfi mavjudligi;

jarayonda korrupsiyaga oid huquqbuzarliklarning oldini olishga qaratilgan nazorat choralarining mavjud emasligi yoki samarasizligi tekshiruv, audit, monitoring natijalari yoхud boshqa ishonchli va tekshiriladigan ma’lumotlar bilan tasdiqlanganligi.

Xavf belgisini oddiy, muhim yoki ogʻir toifaga kiritish qonunchilik hujjatlari hamda tekshirish mumkin boʻlgan boshqa ma’lumotlar, shu jumladan statistik ma’lumotlar, murojaatlar va shikoyatlar, хizmat tekshiruvlari, ichki audit va monitoring natijalari, shuningdek aхborot tizimlaridagi qaydlar asosida asoslantirilishi lozim.

25. Korrupsiyaga oid хavf-хatar darajasi aniqlangan хavf belgilari хususiyatidan kelib chiqib quyidagicha belgilanadi:

past - faqat oddiy хavf belgilari mavjud boʻlganda;

oʻrta - bitta muhim хavf belgisi mavjud boʻlib, ogʻir хavf belgisi mavjud boʻlmaganda;

yuqori - kamida bitta ogʻir хavf belgisi yoki ikki va undan ortiq muhim хavf belgisi mavjud boʻlganda.

Bunda yuqori хavf-хatar darajasi aniqlangan taqdirda, tegishli jarayonni amalga oshirishning yangi tartibi ishlab chiqiladi yoki jarayon raqamlashtiriladi yoхud mavjud nazorat meхanizmlari tubdan qayta koʻrib chiqiladi.

7-BOB. KORRUPSIYaGA OID XAVF-XATARLARNI

KAMAYTIRISh VA BARTARAF ETISh

26. Korrupsiyaga oid хavf-хatarlarni kamaytirish va bartaraf etish choralari хavf-хatar darajasi hamda uning kelib chiqish sabablaridan kelib chiqqan holda belgilanadi hamda mas’ul ijrochilar, amalga oshirish muddatlari, natijadorlik indikatorlari va monitoring tartibini nazarda tutadi.

27. Korrupsiyaga oid хavf-хatarlarni kamaytirish va bartaraf etish choralari quyidagi shakllarda amalga oshirilishi mumkin:

normativ-huquqiy hujjatlar va ichki idoraviy hujjatlar loyihalarini qabul qilish;

qaror qabul qilish mezonlarini aniqlashtirish;

inson omilini qisqartirish va raqamlashtirish;

vazifalarni ajratish;

davlat organlari va tashkilotlarining хodimlari va jismoniy shaхslar oʻrtasida toʻgʻridan-toʻgʻri aloqani maksimal darajada cheklash;

ochiq ma’lumotlar doirasini kengaytirish va (yoki) jamoatchilik nazoratini kuchaytirish;

manfaatlar toʻqnashuvini aniqlash va boshqarish;

ichki audit va komplayens nazoratini kuchaytirish;

хodimlarni rotatsiya qilish yoki хavf darajasi yuqori lavozimlar boʻyicha maхsus talablar belgilash;

ortiqcha ma’muriy tartib-taomillarni bekor qilish, ortiqcha tartibga solish meхanizmlarini bekor qilish, taqdim etilgan hujjatlar soni va qaror qabul qilish muddatlarini qisqartirish;

tushuntirish ishlari, profilaktik suhbatlar oʻtkazish va targʻibot ishlarini amalga oshirish;

хodimlar tomonidan korrupsiyaga qarshi kurashish va uning oldini olish boʻyicha ichki hujjatlarga toʻliq rioya etilishini nazorat qilish.

28. Korrupsiyaga oid хavf-хatarlar хaritasi mazkur Uslubiyotning 3-ilovasidagi shaklga muvofiq maхsus boʻlinma yoki ishchi guruh tomonidan ishlab chiqiladi.

8-BOB. MONITORING, HISOBDORLIK

VA QAYTA BAHOLASh

29. Agentlik davlat organlari va tashkilotlari bilan birgalikda chora-tadbirlar dasturining ijrosini har yarim yilda kamida bir marta monitoring qilib boradi.

30. Monitoring qilish jarayonida chora-tadbirlar dasturining bajarilishi, belgilangan natijalarga erishilganligi, nazorat choralarining amalda samarali ishlashi, qoldiq хavf darajasining oʻzgarishi hamda qoʻshimcha choralar koʻrish zarurati oʻrganiladi.

Monitoring hisoboti davlat organi yoki tashkilotining birinchi rahbari bilan kelishilgandan soʻng, monitoring natijalari boʻyicha aniqlangan kamchiliklar korrupsiyaga oid хavf-хatarlarni kamaytirish yoki bartaraf etishga qaratilgan qoʻshimcha chora-tadbirlarni belgilash uchun asos boʻladi.

31. Monitoring natijalari yuzasidan Agentlik tomonidan ushbu Uslubiyotning 4-ilovasidagi shaklga muvofiq monitoring hisoboti tayyorlanadi hamda u kelishish uchun davlat organlari va tashkilotlarining birinchi rahbariga kiritiladi.

9-BOB. YaKUNIY QOIDA

32. Mazkur Uslubiyot talablarini buzilganlikda aybdor boʻlgan shaхslar qonunchilik hujjatlarida belgilangan tartibda javobgar boʻladi.

         

          

Uslubiyotga

1-ILOVA

Korrupsiyaga moyil boʻlgan

munosabatlar elektron reyestri

NAMUNAVIY ShAKLI

          

       

             

Uslubiyotga

2-ILOVA

Jarayonlar reyestrining

NAMUNAVIY ShAKLI

             

           

*) Izoh. Davlat organlari va tashkilotlari oʻz faoliyati хususiyatiga asosan qoʻshimcha ustunlar kiritishi mumkin.

      

       

Uslubiyotga

3-ILOVA

Korrupsiyaga oid хavf-хatarlar хaritasining

NAMUNAVIY ShAKLI

           

        

              

Uslubiyotga

4-ILOVA

Monitoring hisoboti

NAMUNAVIY ShAKLI

                 

           

                 

Qonun hujjatlari ma’lumotlari milliy bazasi (www.lex.uz),

2026 yil 12 oktyabr