Balansdan tashqari 014 schyotidan 5910 schyotiga oʻtkazma berib boʻlmaydi, chunki balansdan tashqari hisobvaraqlar bir yoqlama tizimda yuritiladi.

Ortiqcha aktivlar tashkilotning moliyaviy natijalariga olib borish bilan kirim qilinadi.

Markirovkalangan tovarlar markirovkalash tizimidagi shaxsiy kabinetda xujjatni yoki xabarnomani rasmiylashtirish orqali hisobdan chiqariladi.

Mas’ul saqlashga qabul qilingan tovar-moddiy qiymatliklar balansda hisobga olinmaydi. Ularning hisobi balansdan tashqari schyotda yuritiladi.

Sizning vaziyatingizda televizorlarni buxgalteriyaga kirim qilish va sotishga doir hujjatlarda ularning rusumlari adashtirilganligi ehtimoli katta.

Inventarizatsiya natijalari boʻyicha buxgalteriya oʻtkazmalari Inventarizatsiya jarayonida aniqlangan mol-mulk kamomadi va ortiqchasining buxgalteriya hisobi tartibi toʻgʻrisidagi Nizomga muvofiq amalga oshiriladi.

Inventarizatsiya natijasida aniqlangan kamomadlar buxgalteriya hisobida qanday aks ettirilishi AVda 2004 yil 6 aprelda 1334-son bilan roʻyxatga olingan Nizomda toʻliq yoritilgan.

Inventarizatsiya natijasida aniqlangan foydalanishdagi inventarlar haqiqatda avval korxonada hisobdan chiqarilib, lekin 014 schyotiga kirim qilinmagan boʻlsa, buni tasdiqlovchi hujjatlar asosida 014 schyotda hozirda aks ettiriladi.

Inventarizatsiya natijalari buxgalteriyada Inventarizatsiya jarayonida aniqlangan mol-mulk kamomadi va ortiqchasining buxgalteriya hisobi tartibi toʻgʻrisidagi Nizomga asosan aks ettiriladi.

Qayta navlarga ajratish natijasida ortiqcha chiqish va kamomadlar oʻzaro hisobga olinadi.

Inventarizatsiya natijasida aniqlangan kamomad bozor qiymatida undiriladi.

Buxgalteriya oʻtkazmalarida 5910 “Kamomadlar va qiymatliklarning buzilishidan yoʻqotishlar” schyotini qoʻllashni tavsiya etamiz.

Tovarning bozor narxi – bu muayyan paytda ushbu tovarni sotib olish uchun yetarli boʻlgan summa. Bozor narxini sizga tovar yetkazib beradigan korxonaning narxlari boʻyicha aniqlashingiz mumkin.

Hisobga olinmagan ob’yektlarni inventarizatsiya oʻtkazish natijasida hisobga olishingiz mumkin. Lekin avval, ob’yektlar aynan sizning yer uchastkangizda joylashganiga va ular oʻzga shaxslarga tegishli emasligiga ishonch hosil qiling.

Korxonalarda TMZ tannarxi boʻyicha hisobga oldinadi. Korxonaning boshqa tashkilotga saqlash uchun bergan mol-mulki korxona balansidan chiqarilmaydi va alohida schyotda hisobga olinadi. Mol-mulkni saqlash shartnomasi boʻyicha keltirilgan zarar summasi 4860 “Da’volar boʻyicha olinadigan schyotlar”da aks ettirish mumkin.