Byudjetga toʻlanadigan QQS summasi hisoblangan soliqdan hisobga olinadigan QQSni chegirish orqali aniqlanadi.

Soliq solish maqsadida mulkiy huquqlar, shu jumladan kreditorning qarzdordan qarzni talab qilish huquqi tovar deb e’tirof etiladi.

Xalqaro konteyner tashish va u bilan bogʻliq ayrim xizmatlarga QQSning nol stavkasi qoʻllanilishi mumkin. Buning uchun Soliq kodeksi talablari bajarilishi va xizmatlar tegishli hujjatlar bilan tasdiqlanishi lozim.

QQSning 80% miqdoridagi qaytariladigan summasi foyda soligʻini hisoblab chiqarishda jami daromadga kiritiladi va Foyda soligʻi hisob-kitobiga 1-ilovada aks ettiriladi.

QQS summasi faol QQS guvohnomasiga ega boʻlgan soliq toʻlovchilar tomonidangina hisobvaraq-fakturalar (yuk bojxona deklaratsiyasi) asosida hisobga olinishi mumkin.

Realizatsiya qilish joyi Oʻzbekiston hududi boʻlgan tovarlarni (xizmatlarni) realizatsiya qilish aylanmasi QQS solish ob’yektidir.

Tender hujjatlarining barcha toʻlangan yoki toʻlanishi lozim boʻlgan soliqlarni hisobga olish toʻgʻrisidagi talabi belgilangan tartibda ushbu soliqdan ozod etilgan operatsiya boʻyicha QQS summasini narxga kiritish majburiyatini anglatmaydi.

Byudjet tizimi byudjetlari mablagʻlari hisobidan moliyalashtirilmaydigan qurilish ob’yektlari boʻyicha esa maxsus EHF shaklini qoʻllash talabi tatbiq etilmaydi.

QQSni hisobga olish huquqi realizatsiya qilish boʻyicha aylanmalar mavjud yoki mavjud emasligidan qat’i nazar yuzaga kelishi mumkin. Muhimi, sotib olinayotgan tovarlar (xizmatlar) soliq solinadigan aylanmalarni amalga oshirish maqsadida foydalanilayotgani yoki kelgusida shunday aylanmalarni amalga oshirish uchun foydalanilishi hisoblanadi.

Mazkur imtiyoz ijara huquqini olishga emas, balki yer uchastkasini mulk qilib olishga nisbatan qoʻllaniladi.

Gʻolib tomonidan toʻlangan 6 mlrd soʻm ob’yektning yakuniy sotish narxi sifatida koʻrsatilgan boʻlsa va ushbu summadan ortiqcha mablagʻ xaridordan undirilmasa, QQSni 6 mlrd soʻmga 12% sifatida qoʻshib hisoblash mumkin emas, QQS 6 mlrd soʻm ichida ajratib hisoblanadi.

Asosiy faoliyat turi – yuridik shaxsning hisobot davri yakunlari boʻyicha umumiy realizatsiya qilish hajmidagi sof tushum ulushi ustunlik qiladigan faoliyat (SK 60-m. 2-xatb.).

Ta’sischi tomonidan toʻlab berilgan 5 mln soʻm hisobga olingan QQS summasiga ta’sir koʻrsatmaydi.

Jamiyat tomonidan 2026 yilda avvalgi uch yil uchun QQS boʻyicha aniqlashtirilgan hisobotlar taqdim etilganda, ushbu hisobotlardagi oʻzgarishlarga sabab boʻlgan holatlar soliq auditi oʻtkazilgan vaqtda mavjud boʻlmagan yoki audit doirasida QQS hisoblanishi va toʻlanishi tekshirilmagan boʻlsa, soliq auditi oʻtkazilganligining oʻzi aniqlashtirilgan hisobotlarni qabul qilishni rad etish uchun asos boʻlmaydi.

SKga koʻra importerlarga aylanmadan olinadigan soliq tatbiq etilmaydi va ular QQS toʻlaydi.