Кичик ва ўрта бизнесда корхоналар бевосита мулкдор-таъсисчи томонидан бошқарилади. Хусусан, корхонанинг активлари бевосита таъсисчи томонидан тасарруф эталади. Ҳисоб-китоблар ҳам таъсисчининг иштирокида амалга оширилади. Мисол учун, бухгалтерия ҳисоби бўйича 100 млн сўмлик ТМЗ қолдиғи мавжуд, ҳақиқатда эса ТМЗ қолдиғи 50 млн сўмни ташкил этиши мумкин. Ушбу ҳолатда мулкдор ТМЗни нақд пулга сотиб юбориши мумкин ва албатта жавобгар сифатида раҳбар ва бухгалтер жаримага тортилади. Бундай ҳолатлар кўп учрайди ва табийки, таъсисчи корхонанинг эгаси бўлгани учун унга қаршилик қилиш ишдан кетиш билан якунланади.