Сметада кўрсатилмаган ва ҳақиқатда ишлатилганлиги ҳужжатларда кўрсатилмаган мол-мулкни қурилиш тугагач объектнинг бошланғич нархига киритолмайсиз.

Бузилган бинолар эгаларига янги қурилган кўчмас мулк берилганида, уларнинг қиймати 9430 «Бошқа операцион харажатлар» счётига ҳисобдан чиқарилади.

Қуриб битказилган цех биноси корхонангиз учун асосий восита ҳисобланади. Ушбу объектнинг бошланғич қиймати уни қуриб битказишга сарфланган ҳақиқий харажатлар суммасига тенг.

Қурилиш ишлари бошланишидан олдин уларни амалга оширмасликка қарор қилинса, лойиха-смета ҳужжатлари ва экспертиза хулоси учун қилинган харажат қиймати бошқа операцион харажатларга чиқарилади, бунда ушбу харажатлар суммаси фойда солиғи тўловчиларида солиқ солинадиган базадан чегирилмайди, ЯСТ тўловчиларида эса солиқ солинадиган базага таъсир қилмайди.

Тугалланмаган қурилиш объекти 0810 “Тугалланмаган қурилиш” счётида ҳисобга олинади. Амортизация ажратмаларини ҳисоблаш объект асосий воситалар таркибига киритилганидан кейин бошланади. Тугалланмаган қурилиш бўйича қайта баҳолаш ўтказилади.