Ермохина Елена

Должность: - юрист

Специализация: наследование; банковское право; корпоративные отношения; лицензирование

Молия вазирининг 30.01.2015 йилдаги 6-сон буйруғи билан тасдиқланган, АВ томонидан 05.03.2015 йилда 2657-сон билан рўйхатга олинган Ўзбекистон Республикаси Молия вазирлиги ҳузуридаги бюджетдан ташқари Пенсия жамғармаси томонидан пенсия, нафақа ва бошқа тўловларни тўлашни ташкил этиш тартиби тўғрисидаги Йўриқноманинг 20-бандига асосан пенсия ва нафақа тўлови қуйидаги шаклларда амалга оширилади:

а) ишламайдиган шахсларга:

пенсионер ва нафақа олувчининг яшаш жойи бўйича - почта алоқаси объекти орқали;

пенсионер ва нафақа олувчининг яшаш жойи бўйича тижорат банки филиали орқали (банк пластик картаси ҳисобварағи ёки жисмоний шахсларнинг омонат ҳисобварағига ўтказиш йўли билан);

б) ишловчи пенсионерларга - асосий иш жойи орқали.

Ишламайдиган шахсга пенсия ва нафақа тўлови шакли унинг белгиланган шаклдаги Аризасига асосан аниқланади.

Пенсия ва нафақани банк пластик картаси ёки жисмоний шахсларнинг омонат ҳисобварағи орқали олаётган шахснинг аризасига банк пластик картаси бўйича ҳисобварақ ёки жисмоний шахсларнинг омонат ҳисобварағи очганлиги тўғрисидаги маълумотнома ва тижорат банк филиали ҳамда мижоз ўртасида имзоланган шартноманинг нусхаси илова қилиниши лозим. 

Бунда пенсия ва нафақа тўлови шахснинг аризасида кўрсатилган муддат давомида амалга оширилади. Шахснинг аризасида кўрсатилган муддат тугагандан сўнг пенсия ва нафақа тўлови тўхтатилади ҳамда фақат пенсионер ёки нафақа олувчининг аризасига асосан тикланади. 

Пенсия банк пластик картаси ёки жисмоний шахсларнинг омонат ҳисобварағига тўланганда, пенсионер ҳар 6 ойда Пенсия жамғармаси бўлимига келиш йўли билан ўзининг пенсия суммасини олиш ҳуқуқини тасдиқлаши зарур.

Шахс белгиланган муддатда Пенсия жамғармаси бўлимига келмаган тақдирда, Пенсия жамғармаси бўлими ходимлари 10 кун ичида пенсионер:

тирик эканлиги; 

ишга жойлашганлиги;

яшаш жойи ўзгарганлиги ёки Ўзбекистон Республикасидан ташқарига чиқиб кетганлиги;

жазони ижро этиш муассасасида эканлиги;

кексалар ва ногиронларнинг интернат уйларида (пансионатларида) яшаётганлиги ҳолатларини аниқлаш учун пенсионер яшайдиган жойга боради. 

Шахснинг олинадиган пенсияга ҳуқуқлари тасдиқлангандан сўнг, тўлов навбатдаги 6 ойга давом эттирилади.

Пенсионер ҳуқуқлари тасдиқланмаган тақдирда, пенсия тўлаш фуқароларнинг ўзини ўзи бошқариш органларининг тегишли вакиллари ва унинг қўшнилари иштирокида Пенсия жамғармаси бўлими ходимлари томонидан тузилган тўланаётган пенсияни тўлашга ва унинг миқдори асосланганлигига таъсир кўрсатувчи ҳолатни тасдиқлайдиган далолатнома асосида тўхтатиб турилади.

Мазкур далолатнома асосида комиссия пенсияни тўлашни тўхтатиб туриш (тўхтатиш) ёки унинг миқдорини ўзгартириш тўғрисида 3 кун муддатда тегишли қарор қабул қилади. 

15.08.2012 йилдаги МВнинг 58-сон ва ЎзАААнинг 10-8/2927-сон Қарори билан тасдиқланган, АВ томонидан 28.09.2012 йилда 2394-сон билан рўйхатга олинган "O`ZBEKISTON POCНTASI" АЖнинг почта алоқасининг минтақавий (вилоят) ташкилотлари ва почта алоқаси объектлари орқали пенсиялар, нафақалар ва бошқа тўловларни тўлашни ташкил этиш тўғрисидаги Йўриқномага асосан пенсиялар ва нафақалар қайдномалар бўйича ҳар ойда етказиб бериш (топшириш) даври давомида пенсия ва нафақа олувчининг шахсан ўзига (ишончли вакилига) яшаш жойига паспорт тақдим этилганда нақд пул маблағлари билан етказиб берилади (топширилади).

Почта алоқасининг минтақавий ташкилотлари ёки почта алоқаси объектлари (почтамтлар, почта алоқаси боғламалари) чорак бошланишидан 30 кун олдин хизмат кўрсатаётган банкка пенсиялар ва нафақаларни етказиб бериш (топшириш), шунингдек почта пул ўтказмаларини тўлаш учун керакли нақд пул маблағларини олиш учун талабнома тақдим этадилар. Зарурат бўлганида унга шу мақсадлар учун керакли нақд пул маблағларини олиш учун қўшимча талабнома тақдим этишлари мумкин. Пенсиялар ва нафақаларни етказиб бериш (топшириш) етказиб бериш участкасининг жойлашган жойига, шунингдек пенсиялар ва нафақаларни етказиб бериш (топшириш) жадвалига мувофиқ қайдномада кўрсатилган операцион кунда амалга оширилади. 

Пластик карталарни қўллаш ихтиёрий асосда амалга оширилиши зарур. Марказий банк бошқарувининг 21.02.2004 йилдаги 4/20-сон Қарори билан тасдиқланган, АВ томонидан 30.04.2004 йилда 1344-сон билан рўйхатга олинган  Тижорат банклари томонидан банк карталарини чиқариш ва уларни Ўзбекистон Республикасида муомалада бўлиши тартиби тўғрисидаги Низомнинг 18-бандига асосан банк карталарини фойдаланишга (тарқатишга) тақдим этиш банк карталарини тарқатувчи тижорат банки ва унинг мижози ўртасида ёзма равишда тузилган шартнома асосида амалга оширилади. 

25.04.1996 йилдаги “Банклар ва банк фаолияти тўғрисида”ги 216-I-сон Қонуннинг 31-моддасига мувофиқ банклар ва уларнинг мижозлари ўртасидаги муносабатлар шартномалар асосида амалга оширилади. 

Шундай қилиб, ишламайдиган шахсга пенсия ва нафақа тўлови шакли унинг Аризасига асосан аниқланади.