Ўзбекистон Республикаси Биринчи Президентининг «Банк пластик карточкалари асосида ҳисоб-китоблар тизимини ривожлантиришни рағбатлантиришга оид қўшимча чора-тадбирлар тўғрисида»ги қарори доирасида қабул қилинган Марказий банк ва Ўзбекистон банклар ассоциацияси банклараро чакана тўлов тизимида мижозларга хизмат кўрсатишда “сўм” пластик карточкалари орқали ҳисоб-китобларни амалга оширишда банк ва нобанк кредит ташкилотлари амал қилиши лозим бўлган тарифларнинг янги режаси жисмоний ва юридик шахсларга бир қатор қулайлик ва шароитлар яратмоқда, жумладан, мамлакатда нақд пулга бўлган талабни камайтириб, пул айланишининг тезлашишига шароит яратади. Жорий йилнинг 1 мартидан кучга кирган ушбу янги тариф режасининг 6-қисмида жисмоний шахслардан уларнинг банк пластик карточкаларига барча турдаги маблағларни кирим қилиш ва жисмоний шахсларнинг банк пластик карточкаларига маблағларни ташкилотлар томонидан ўтказишдаги банк хизмат ҳақи бепул деб белгилаб қўйилган. Шу муносабат билан қуйидаги масалаларга ойдинлик киритсангиз: 1. Корхона томонидан хизмат ишлари учун шахсий автомобилдан фойдаланганлик учун компенсация тўловлари ходимнинг пластик карточкасига тўлаб берилганда корхона ёки ходимда банк хизмати ҳақи тўлаш мажбурияти юзага келадими? 2. Корхона томонидан ходимнинг пластик карточкасига қисқа ёки узоқ муддатли қарз ўтказиб берилганда корхона ёки ходимда банк хизмати ҳақи тўлаш мажбурияти юзага келадими? 3. Корхона томонидан муассиснинг пластик карточкасига дивиденд тўлаб берилганда корхона ёки ходимда банк хизмати ҳақи тўлаш мажбурияти юзага келадими?