Ўзи фойдаланиши учун қурилаётган объектда сарфланган материалларни сотиб олишда тўланган ҚҚС суммасини ҳисобга олиш

Саволнинг ID си: 20943

МЧЖ ишлаб чиқариш фаолияти билан шуғулланади. 2021 йилда ишлаб чиқаришни кенгайтириш мақсадида янги ишлаб чиқариш цехи биноси қурилмоқда. Бинони қуриш бўйича қурилиш ташкилоти билан шартнома имзоланган. МЧЖ қурилаётган бино учун зарур бўлган кабель материалини ўз ҳисобидан харид қилиб, қурилиш ташкилотига берди. Қурилиш ташкилотига қурилиш ишларидан ташқари кабелни монтаж қилиш ишлари учун хақ тўланди. Сотиб олинган кабель ҚҚС тўловчисидан сотиб олинган.

МЧЖ ўз эҳтиёжи учун сотиб олинган кабель материалининг ҚҚС суммасини ҳисобга олиши мумкинми?

Экспертларнинг жавоблари:

10.12.2021 йил санасидаги жавоб

10.12.2021

Мирфаязов Миржалал Джуратович

Агар янги қурилаётган цех биноси ҚҚС солинадиган товарларни ишлаб чиқаришда фойдаланилса, уни қуришда сарфланган материалларни сотиб олишда сотувчига тўланган ҚҚС суммасини ҳисобга олишингиз мумкин. Солиқ тўловчи томонидан келгусида ўз асосий воситалари сифатида фойдаланиш учун мўлжалланган активларни яратиш учун товарлар (хизматлар) сотиб олинганда сотувчига тўланган ҚҚС суммасини ҳисобга олиш тўлиқ ҳажмда амалга оширилади (СК 266-м., 3-қ.). Солиқ кодексининг 269-моддасида кўрсатилган ҳолатлар юзага келган тақдирда, илгари ҳисобга олиш учун қабул қилинган ҚҚС суммасига СКнинг 269-моддасида белгиланган тартибда тузатиш киритилади.

Экспертларнинг жавоблари уларнинг фикрларини акс эттиради ва Сиз мустақил қарор қабул қилишингиз учун ахборот асосини яратади. Ушбу сервисдан фойдаланишда Сиз сайт орқали савол бера туриб, уларга рози бўлган қоидаларга амал қилинади. Барча савол ва жавобларни эркин кўриш мумкин.
Жавоблар улар эълон қилинган санада долзарб ҳисобланади.

Ўртоқлашиш: