Латвия резидентининг халқаро ташишлардан олинган даромадига солиқ солиш

Корхонамизга 2018 йил 28 майда Латвия давлатининг корхонаси томонидан қуруқлик орқали транспорт хизмати кўрсатилган. Ушбу хизмат ҳақи 2018 йил 9 июлда тўлаб берилган. Хорижий корхона 2018 йилда Латвия резиденти эканлигини тасдиқловчи сертификатни тақдим этган, доимий муассасаси йўқ ва бўлмаган. Халқаро шартнома меъёрлари қўлланилган ҳолда Ўзбекистонда солиқ солинмаган. 2023 йил 13 июлда солиқ органи ўша хизмат бўйича норезидентнинг даромадига солинадиган солиқни бюджетга тўлаб беришни талаб қилмоқда. Бунга важ қилиб Латвия ва Ўзбекистон ўртасидаги халқаро конвенциянинг 8-моддасида қуруқлик ва темир йўл транспортлари орқали ташишлар назарда тутилмаганлиги айтилмокда. Лекин конвненциянинг 7-моддаси 1-пунктида: «Аҳдлашувчи Давлатлардан бирининг корхонасининг фойдаси фақат шу Давлатда солиққа тортилади» деб айтилган. Шунингдек, 22-моддаси 1-пунктида: «Аҳдлашувчи Давлат резидентининг ушбу Конвенциянинг олдинги моддаларида тилга олинмаган даромад турларига, даромадлар қаерда пайдо бўлишидан қатъи назар, фақат мана шу Давлатда солиқ солинади» деб айтилган.