Солиқ органидан ҳар ойда бир хил маънода келадиган хабарномаларга жавоб бериш

Корхона агентлик шартномаси асосида воситачи сифатида авиачипта сотиш фаолиятини юритади. Корхонанинг даромади авиачипта сотишдан олинадиган воситачилик мукофоти. Ҳар бир авиачиптани сотишда онлайн-НКМ чеки берилади, чек воситачилик фаолиятига мослаштирилган, комитент СТИР деган жойида авиакомпаниянинг СТИР рақами кўрсатилади. Демакки, корхонамизнинг банк ҳисоб рақамига келиб тушган пуллар бизнинг даромадимиз ҳисобланмайди. Муаммо шундаки, айланмадан олинадиган солиқ ҳисоб-китобини тақдим қилишда воситачилик ҳақи суммасини даромад сифатида кўрсатиб, шундан солиқ тўлаймиз. Лекин солиқ органи банк ҳисоб рақамимизга тушган маблағлардан солиқ ҳисоблаб катта суммада қарз кўрсатиб, хабарнома жўнатади. Ҳар ой агентлик шартномаси асосида ишлашимизни ёзиб, ҳақиқий вазиятни тушунтириб жавоб юборамиз. Яъни бу сурункали давом этиб келмоқда.