Кожахметов Сакен Советбекович

Должность: Главный юрисконсульт

Специализация: Консультации по юридическим вопросам

- Хорижий шахсларга Ўзбекистон Республикасида яшаш учун гувоҳнома, фуқаролиги бўлмаган шахсларга Ўзбекистон Республикасида яшаш учун гувоҳнома ва фуқаролиги бўлмаган шахс гувоҳномаси тўғрисидаги низомга (Президентнинг 26.02.1999 йилдаги ПФ-2240-сон Фармонига 2-илова) мувофиқ амакингиз ўзи вақтинча яшаш жойидаги ички ишлар органларига мурожаат қилиши ва Чет эл фуқаролари ҳамда фуқаролиги бўлмаган шахсларни Тошкент шаҳри ва Тошкент вилоятида доимий ва вақтинча прописка қилиш тартиби тўғрисидаги йўриқномага (ички ишлар вазирининг АВ томонидан 14.05.2012 йилда 2363-сон билан рўйхатдан ўтказилган буйруғи билан тасдиқланган, бундан кейин - Йўриқнома) мувофиқ қуйидаги ҳужжатларни тақдим этиши лозим:

белгиланган шакл бўйича 2 нусхада ариза-анкета;

чет эл фуқаросининг паспорти ёки фуқаролиги бўлмаган шахснинг ҳаракатланиш ҳужжати;

уй-жой мулкдори (мулкдорлари)нинг турар жой майдони бериши тўғрисида нотариал тасдиқланган аризаси (розилиги), шунингдек уй-жой учун ҳужжатлар нусхалари;

никоҳ тузилганлиги ёки фарзанд туғилганлиги тўғрисидаги гувоҳноманинг нотариал тасдиқланган нусхалари, зарур ҳолларда яқин қариндошининг вафот этганлиги тўғрисидаги гувоҳнома нусхаси;

хорижий давлатлар ҳуқуқни муҳофаза қилиш органлари томонидан ёки хорижий давлатнинг Ўзбекистон Республикасидаги элчихонаси, консуллик муассасаси томонидан берилган, аввалги яшаш жойи бўйича судланмаганлиги тўғрисида маълумотнома (Мустақил Давлатлар Ҳамдўстлигига аъзо давлатлардан келган хорижий фуқаролар ва фуқаролиги бўлмаган шахслар учун);

35 х 45 мм ўлчамли иккита фотосурат;

ҳужжатларнинг кўриб чиқилганлиги ва расмийлаштирилганлиги учун йиғим тўланганлиги тўғрисидаги квитанция.

Айни вақтда Президентнинг 23.12.1994 йилдаги ПФ-1027-сон Фармонига мувофиқ, собиқ Иттифоқ паспортларининг амал қилиш муддати 2000 йил 1 январда тугаганлигини маълум қиламиз. Шунга биноан, амакингиз Ўзбекистон Республикасида ҳақиқий бўлмаган ҳужжат бўйича яшаётган бўлиб чиқади, республикага келганда фуқаролиги бўлмаган шахс учун яшаш гувоҳномаси олиш мақсадида ички ишлар органларига мурожаат қилиши керак эди.

Агар амакингиз Ўзбекистон ҳудудида "Ўзбекистон Республикасининг фуқаролиги тўғрисида"ги Қонун кучга кирган кунда, яъни 28.07.1992 йилда яшаган бўлса, унга нисбатан мазкур Қонуннинг 4-моддаси амал қилади, унда айтилишича, қуйидагилар Ўзбекистон Республикасининг фуқаролари бўладилар:

1) келиб чиқиши, ижтимоий ва мулкий ҳолатидан, ирқи ва миллатидан, жинси, маълумоти, тили, сиёсий қарашлари, диний эътиқоди, машғулотининг тури ва сажиясидан қатъи назар, ушбу Қонун кучга кирган вақтда Ўзбекистон Республикасида доимий яшаб турган, бошқа давлатларнинг фуқаролари бўлмаган ҳамда Ўзбекистон Республикасининг фуқароси бўлиш истагини билдирган шахслар;

2) давлат йўлланмаси билан Ўзбекистон Республикасидан ташқарида ишлаётган, ҳарбий хизматни ўтаётган ёки ўқиётган шахслар, агар улар Ўзбекистон Республикасининг ҳудудида туғилган бўлсалар ёки доимий яшаганликларини исбот қилган бўлсалар, бошқа давлатларнинг фуқаролари бўлмасалар ва ушбу Қонун кучга кирганидан кейин кечи билан бир йил ичида Ўзбекистон Республикасининг фуқароси бўлиш истагини билдирган бўлсалар".

Шу тариқа, амакингиз юқорида қайд этилган ҳужжатларни тақдим этиши зарур. Республика ҳудудида доимий пропискага эга бўлганидан кейин унга Ўзбекистон Республикаси фуқароси паспортини бериш масаласи ҳал этилиши мумкин.