Йўқ, бу счётларда ҳисобга олинган суммаларни ўзаро қоплаш (яъни зачёт қилиш) мумкин эмас.

Жамиятдан чиқиб кетаётган таъсисчига унинг улушининг жамият молиявий ҳисоботи (баланс) маълумотлари асосида аниқланадиган ҳақиқий қиймати қайтарилади. Бунинг учун аввал жамият соф активларининг миқдорини ҳисоблаб чиқариш лозим.

Кредитор қарзни талаб қилиш ҳуқуқини битим бўйича бошқа шахсга ўтказиши мумкин. Кредитор қарздор корхона фойдасига қарзни талаб қилиш ҳуқуқидан воз кечиши ёки қарз суммасини устав фондидаги улушини оширишга йўналтириш ҳуқуқига эга.

Жамият соф фойдани ҳар йили таъсисчилар ўртасида дивиденд тарзида тақсимлаши мажбурий эмас. Бу масала, жамият уставига мувофиқ, таъсисчиларнинг умумий йиғилишида ҳал қилинади.

Жамият таъсисчилари жамият мол-мулкини ўз улушларига мутаносиб равишда эмас, тенг миқдорда бўлиб олишга қарор қилишлари ман этилмаган. Лекин бу ҳолда солиқ тўлаш мажбуриятлари юзага келиши мумкин.

Корхона мулкдорига бўлган қарздорликни корхонанинг зарарини қоплаш учун йўналтириб бўлмайди. 87 00 счётлар гуруҳида акс эттирилган зарар суммаси фақат корхонанинг кейинги йиллардаги молиявий-хўжалик фаолиятидан олинган фойда ҳисобига қопланиши мумкин.

Ҳисобланган дивидендлардан тўлов манбаида 10 фоиз ставкада солиқ ушлаб қолинади. 

Қонун ҳужжатларига асосан, жамият иштирокчилари устав фондидаги ўз улушидан бошқа шахслар фойдасига воз кечиши мумкин. Бундай битимлар оддий ёзма шаклда тузилади. Жамиятда солиқ оқибатлари юзага келмайди. Битим иштирокчилари бўлган шахсларда солиқ тўлаш мажбурияти юзага келиши мумкин.

Йиллар давомида жамланиб келган фойдани улушдорлар ўртасида тақсимлаш мумкин. Дивиден солиғи жамланган (тақсимланмаган) фойдадан эмас, дивиденд тарзидан тақсимланган фойдадан тўланади.

Таъсисчи муассислар таркибидан чиққанда унга дастлабки ҳисса доирасида берилган мол-мулк ҚҚС бўйича солиқ солиш объекти ҳисобланмайди.